Сарны дэлхий рүү хардаггүй талын ховор дүрс бичлэгийг Blue Ghost станц ирүүлжээ

АНУ-ын Техас мужид үйл ажиллагаа явуулдаг Firefly Aerospace хувийн компанийн зохион бүтээсэн “Blue Ghost” нэртэй судалгааны станц хоёрдугаар сарын 13-ны өдөр сарны тойрог замд амжилттай нэвтэрсэн юм.

Тэр үеэс хойш уг станц сарны гадаргын дүрс, гэрэл зургуудыг ирүүлсээр байгаа.

Хамгийн сүүлд уг станц сарны дээд өндрийн тойрог замаас нам өндрийн тойрог замд шилжиж, сарны гадаргаас 120 км зайд хүрснийхээ дараа дэлхий рүү хардаггүй талынх нь ховор дүрс бичлэгийг ирүүлжээ.

“FireFly компанийн Blue Ghost станцын хамгийн сүүлийн ирүүлсэн сарны дүрс бичлэг үнэхээр гайхалтай. Мэдээж бид энэ зураглал ямар харагдах талаар төсөөлөлтэй байсан. Гэхдээ өөрсдийн бүтээсэн сансрын хөлгөөс авсан сарны тогоонууд, хад чулуунуудын дүрсийг хараад үнэхээр их урам зориг авч байна. Шаргуу хөдөлмөрлөсний эцэст бидний зорилго биелэхэд ямар ойрхон ирснийг харах сайхан байна” гэж станцыг бүтээсэн инженерүүдийн ахлагч Жозеф Марлин хэлсэн байна.

FireFly компанийн станц хоёрдугаар сарын 8-ны өдөр дэлхийн тойрог замаас гарч, саранд хүрэх алс холын аяллаа эхлүүлсэн юм.

Дэлхийгээс сар хүртэлх зай дунджаар 384,400 км орчим байдаг.

Одоо Blue Ghost станц сарны тойрог замыг туулах 16 хоногийн аяллынхаа талыг дуусгаад байгаа бөгөөд гуравдугаар сарын 2-ны өдөр газардах оролдлогоо эхлүүлнэ.

Тус станц НАСА-гийн саран дээр хүн буулгах Артемис төслийн судалгаанд зориулсан 10 багаж төхөөрөмжийг тээвэрлэж яваа юм.

Blue Ghost станц сарны дэлхий рүү харсан талын зүүн ирмэг дээр орших “Mare Crisium” нэртэй, 483 км өргөн хэмжээтэй эртний тогоон дотор газардана.

Станц газардсаны дараа дэлхийн хэмжүүрээр 14 хоног ажиллаад амрах горимд шилжих бөгөөд энэ нь сарны хүйтэн урт шөнө эхлэхтэй холбоотой.

Эх сурвалж: CNN