Л.Гантөмөр: Д.Цогтбаатар гишүүний тухайд шүүх залуу хүнээр хамаагүй оролддог нь буруу

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын гишүүн Д.Цогтбаатарыг гэм буруутайд тооцсон гурван шатны шүүхийн шийдвэр гараад буй. Түүнийг эгүүлэн татах эсэхэд парламентын зүгээс тодорхой хариулт өгөөгүй байгаа юм.

Энэ талаар АН-ын дарга Л.Гантөмөрөөс сэтгүүлчид тодруулахад дараах хариултыг өгөв.

АН-ын дарга Л.Гантөмөр “Д.Цогтбаатарыг Их хуралд нэрийг нь дэвшүүлчхээд дараа нь татна гэдэг бол утгагүй зүйл. Шүүх тэр шийдвэрээ өмнө нь гаргаж байхгүй яасан юм.

Бид ял, шийтгэлтэй хүнийг л нэр дэвшүүлэхгүй байх үүрэгтэй. Ял шийтгэлгүй хүн сонгуульд нэр дэвших бүрэн эрхтэй. Шүүх залуу хүнээр хамаагүй оролддог нь буруу. Шүүхийн шийдвэр Их хуралд ирэг. Тэгээд ярина" гэдэг хариулт өглөө. 

Д.Цогтбаатар гишүүний холбогдсон хэргийн талаар эргэн сануулахад, тэрбээр 2016-2020 оны хугацаад Хөгжлийн Банкны хэлтсийн захирлаар ажиллаж байхдаа албан тушаалаа урвуулан ашиглаж, бусдад давуу байдал олгосон хэрэгт холбогдсон. Сүхбаатар дүүргийн Эрүүгийн хэргийн анхан шатны шүүхээс 2023 оны долдугаар сард түүний энэ үйлдэлд нийтийн албанд томилогдох эрхийг хоёр жилээр хасаж, 20 сая төгрөгөөр торгох шийтгэл оноосон. Хяналтын шат буюу Улсын дээд шүүхийн тогтоолд "Д.Цогтбаатарыг албан тушаалаа урвуулан ашиглаж, “Мон дулаан”, “Газ импорт”, “Бэрэн” ХХК-д давуу байдал бий болгосон, Хөгжлийн банканд их хэмжээний хохирол учруулсан гэм буруутайд тооцож, ял шийтгэсэн анхан шатны шүүхийн тогтоол хууль ёсны, үндэслэлтэй гарсан байх тул шийтгэх тогтоолын холбогдох хэсгийг хэвээр үлдээв” гэжээ. Харин түүнийг буруутгасан “Сэлэнгийн герфорд” ХХК, “Пи Си Вай” ХХК-д холбоотой үйлдлийг хэрэгсэхгүй болгосон байна.

Хуулийн дагуу гэмт хэрэгт холбогдсон болон гэм буруутай нь тогтоогдсон УИХ-ын гишүүний бүрэн эрхийг хэвээр үлдээх эсэхийг УИХ-ын Халдашгүй байдлын дэд хороогоор хэлэлцээд дараа нь холбогдох байнгын хороо, чуулганы нэгдсэн хуралдаанд оруулан санал хураалтаар шийднэ.