ФОТО: "Hakuho Cup 2025" тэмцээний багийн төрөлд Монголын баг МӨНГӨН медаль хүртлээ

Гэрэл зургийг Инжинааш Бор

-Япон Улсаас Канако Оноши мэдээлж байна-

Энэ сарын 11-нд Токиогийн Рёогокү Кокүгикан ордонд 15 дахь удаагийн "Hakuhu Cup 2025" боллоо. Энэ удаагийн тэмцээнд Япон, Монгол, Хонконг, Украин, АНУ, Тайвань, Бразил, Киргиз, Узбекистан зэрэг 13 орон, бүс нутгаас 1,100 тамирчин оролцсон юм.

Багийн төрөлд 202 багаас Г.Наранбат дасгалжуулагчтай Ц.Хишигбаяр, Н.Түвшинсайхан, Б.Амармэнд, Б.Батбилгүүн, Ж.Билгүүдэй нарын Монголын баг мөнгөн медаль хүртэв. 

Тэмцээний талаар багш Г.Наранбат “15 жилийн ой тохиож буй энэ тэмцээнд амжилттай оролцох нь бидний зорилго байсан. Үргэлж хичээл зүтгэлтэй байдаг хүүхдүүддээ баярлаж байна” гэлээ.

Бага дунд сургуулийн 13-15 насны ангилалд Монголоос Тоттори мужийн Ниши бага дунд сургуульд сүмо бөхөөр хичээллэж буй Т.Чилгүүн алт, Ө.Хашмаргад хүрэл медаль зүүв.

Миягино ояката 2009 оноос хойш зохион байгуулж буй тус тэмцээн нь 15 хүртэлх насны тамирчид оролцох боломжтой сүмогийн тэмцээн гэдгээрээ онцлог юм.

Сүмочдын хүсэн хүлээдэг Сүмогийн төв ордны дэвжээн дээр хүүхдүүдийн хөлс хүч, баяр баясал бас нулимс дусалсан өдөр болж өнгөрлөө. Энэ тэмцээнд оролцож, сайн барилдах нь сүмогоор хичээллэдэг хүүхдүүдийн зорилго болж, хэдэн жилийн дараа мэргэжлийн бөх болох тохиолдол нэмэгдсээр байна. Японд төдийгүй дэлхийн сүмод хайртай хүүхдүүдэд том мөрөөдөл бэлэглэдэг билээ.

ФОТО