"Торгуулийн хэмжээ нь ₮450,000-ыг давсан бол жолоочоор нийтэд тустай ажил хийлгэж, төлүүлэх журам ирэх сарын 1-нээс хэрэгжинэ"
Улаанбаатар хотод албан татвараа төлөөгүй 231,397, хуулиар оногдуулсан торгуулиа төлөөгүй 355,300 тээврийн хэрэгсэл байгаа бөгөөд энэ сарын 1-нээс зөрчил бүхий тээврийн хэрэгслийн хөдөлгөөнийг хязгаарлах зохицуулалт хийгдэж эхлээд буй. Уг ажил таван сарын турш үргэлжилж, үр дүн нь ирэх оны зургаадугаар сард гарах гэнэ.
Харин 2025 оны нэгдүгээр сарын 1-нээс бас нэг шинэ журам хэрэгжиж эхлэхээр болсныг Тээврийн Цагдаагийн Албаны/ТЦА/ эх сурвалж тодотгов.
Тодруулбал замын хөдөлгөөний дүрмийг зөрчиж, торгуулийн хэмжээ нь 450,000 төгрөгийг давсан бол тээврийн хэрэгслийн жолоочоор нийтэд тустай ажил хийлгэж, төлүүлэх юм байна. Ингэхдээ нэг өдөрт 8 цаг ажиллуулж, хөлсийг 15,000 төгрөгөөр тооцно.
450,000 төгрөгөөс бага байвал албадан төлүүлэх, тээврийн хэрэгслийг торгууль төлж дуусах хүртэл хугацаанд журмын хашаанд аваачих нь.
Одоогийн байдлаар торгуулиа хуульд заасан хугацаанд төлөөгүй жолоочийг тээврийн хэрэгсэл жолоодох эрхийн үнэмлэх авах, ангилал нэмэх, сунгах, өөрчлөх, тээврийн хэрэгслийн шилжилт хөдөлгөөн хийх эрхийг хязгаарлах арга хэмжээг авч ажиллаж байгаа аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
80 СЭТГЭГДЭЛТЭЙ
|
