"Барилгын үйл ажиллагааны тусгай зөвшөөрөл: Өөрчлөлт, шинэчлэл 2024" нээлттэй өдөрлөгийг өнөөдөр зохион байгууллаа. 

Хот байгуулалт, барилга, орон сууцжуулалтын яам болон Монголын Барилгын Үндэсний Ассоциаци (МБҮА) төрийн бус байгууллага хамтран зохион байгуулсан уг хэлэлцүүлэгт Хот байгуулалт, барилга, орон сууцжуулалтын сайд Ж.Батсуурь, МБҮА төрийн бус байгууллагын тэргүүн дэд ерөнхийлөгч Б.Нэмэхбаяр, Азийн Хөгжлийн Банкны зөвлөх Вилльям Косар зэрэг хүмүүс оролцсон юм.

Төрийн зарим чиг үүргийг гэрээний үндсэн дээр шилжүүлэх тухай Засгийн газрын 325 дугаар тогтоол 2010 онд гарсан. Үүний дараа 2020 онд 340 дүгээр тогтоолын хүрээнд салбарын төрийн бус байгууллагууд түншилж, үйл ажиллагааны тусгай зөвшөөрлийг олгох ажлыг зохион байгуулах болсон юм.

Энэ эрхийг төрийн бус байгууллагад шилжүүлснээр 2019 онд хагас цахимжуулсан бол 2021 оноос бүрэн цахимжуулж, төрийн үйлчилгээний ХУР, ДАН, И-Монгол системүүдтэй холбогдсон. Улмаар барилгын салбарын нэгдсэн мэдээллийн санг бий болгосон нь гол ололт болохыг зохион байгуулагчид онцоллоо.

С.Төмөрхүү: Иргэдийг амины орон сууцандаа сайхан амьдрах боломжийг хангахын тулд мэргэжилтнүүд бэлдэх шаардлагатай

 

Хэлэлцүүлгийн талаар Хот байгуулалт, барилга, орон сууцжуулалтын яамны Төрийн нарийн бичгийн даргын албан үүргийг түр орлон гүйцэтгэгч С.Төмөрхүү "Барилгын тухай хуулийн дагуу үйл ажиллагаа эрхлэхэд тусгай зөвшөөрөл олгодог.

2012 болон 2017 оноос хойш дөрвөн төрлийн тусгай зөвшөөрлийг төрийн бус байгууллагуудаар дамжуулан олгож эхэлсэн.

Өндөр хөгжилтэй улс орнуудын тусгай зөвшөөрөл, тэндхийн инженер, техникийн ажилтнуудын диплом болон бичиг баримтыг Монголд хүлээн зөвшөөрч, тэр улс орнуудын зураг төслийг шууд хэрэглэхээр хүлээн зөвшөөрөх ийм өөрчлөлтийг оруулахаар зорьж байгаа.

Тодруулбал үндэстэн дамнасан гаднын томоохон компаниудыг Монголд барилга угсралтын үйл ажиллагаа явуулах боломжоор хангахаар төлөвлөж байна. Манай үндэстний аж ахуйн байгууллагууд ямар нэгэн хэлбэрээр оролцох эрх нь нээлттэй.

Түүнчлэн Засгийн газраас ипотекийн зээлийг амины орон сууцанд олгодог болохоор зорьж байгаа. Иргэд хашаандаа байшин бариад ипотекийн зээлд хамруулах шаардлага бий. Судалгаанаас үзэхэд хашаандаа сайхан амьдрах боломжийг бүрдүүлбэл иргэд амины орон сууцанд амьдрах сонирхолтой байгаа нь батлагдсан.

Тэдэнд тулгарч буй гол асуудал нь нийтийн байранд өгдөг шиг зээл олддоггүй. Ийм нөхцөлөөр хангахын тулд банкны шаардлагад нийцсэн, дулааны алдагдал багатай, гамшигт тэсвэртэй барилга барих талаар зөвлөгөө өгдөг мэргэжлийн хүмүүсийг бэлдэх шаардлагатай байна" гэж ярилаа.