Б.Норовсамбуу: 1966 онд Самбуу даргын өрөөнөөс БНМАУ-ын гавьяат жүжигчин цолыг авч байсан. Өнөөдөр Хөдөлмөрийн баатар цол хүртлээ

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын циркийн урлагийн байгууллагуудын нэгдсэн хорооны гишүүн байгууллага “Хүн сарнай” уран нугаралтын төвийн тэргүүн, Төрийн шагналт, Ардын жүжигчин, уран нугараач Б.Норовсамбууд өнөөдөр Монгол Улсын Хөдөлмөрийн баатар цол хүртээлээ.

Шагнал авсны дараа уран нугараач, Хөдөлмөрийн баатар Б.Норовсамбуу "1966 онд Циркийн Сосор дарга намайг хөтлөөд Самбуу даргын өрөөнд орж, тэндээс БНМАУ-ын гавьяат жүжигчин цолыг авч байсан юм. Өнөөдөр анхдугаар Үндсэн хуулиа баталсны 100 жилийн ойг тохиолдуулж Монгол Улсын Хөдөлмөрийн баатар цолыг авлаа.

Тэнгэрийн оронд байгаа миний багш, ардын жүжигчин Цэнд-Аюуш, хөдөөнөөс хөтөлж ирж, циркийн урлагт оруулсан ээждээ, монголын ард түмэнд, циркийн салбарын бүх хүнд баярлалаа.

1958 онд есөн настайдаа циркт орохоор хөдөөнөөс ирж, 10 настайдаа анх тайзан дээр нугарсан юм. Миний анхны нугаралт "Цэцгэн дээрх эрвээхэй" нэртэй тоглолт. Үүний дараа улс хувьсгалын 40 жилийн ойгоор тэнцвэрт нугаралтыг хийж, олон жил олон газраар тоглосон доо.

1980 онд Африкийн орнуудаар анх удаа явж, монгол гэдэг нэрийг гаргаж явсан нь дурсгалтай, Москвагийн эрдмийн их театрын тайзан дээр үзэгчдэд гурван удаа тоглолтоо толилуулсан. Австрали тивээс бусад хүн амьдардаг бүх тивд циркийн урлагийг сурталчилж явлаа.

Циркийн урлагт жүжигчин, уран сайхны удирдагч, багш ажлыг хийж байв. Одоо "Хүн сарнай" уран нугаралтын төвд багшаар ажиллаж байна" гэж ярилаа.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Тэрбээр Монголын циркийн урлагийн шинэ хөтөлбөр, үзүүлбэр найруулан, урын санг нь баяжуулж, монголын циркийн урлагийн түүхэнд анх удаа тэнцвэрт нугаралт хийн, дэлхий дахинаа сурталчлан таниулж, үе үеийн мэргэжлийн жүжигчдийг бэлтгэн сургаж, циркийн урлагийг хөгжүүлэх үйлсэд жинтэй хувь нэмэр оруулсан хүн билээ.