С.Батсайхан: Жил бүр л замын хажууд ахуйн хогтой холилдсон шаврыг уул шиг овоолсныг иргэд анзаардаг байх

Улаанбаатар хотын хэмжээнд 112 км урт зам, талбайн борооны ус зайлуулах шугам, 8,000 гаруй шүүрт худаг байдаг бөгөөд лаг хагшаасыг цэвэрлэх ажил үргэлжилж байгаа аж. Эдгээрийг жилд хоёр удаа цэвэрлэдэг байна.

Энэ талаар Геодези, Усны Барилга Байгууламжийн Газрын ерөнхий инженер С.Батсайхан "Нийслэлд 112 км урт зам, талбайн борооны ус зайлуулах шугам, ус хүлээж авах 8,000 гаруй шүүрт худаг бий. Ус хүлээж авах худгуудыг хавар, намарт хоёр удаа цэвэрлэдэг юм. Бороо орсны дараах лаг хагшаасны цэвэрлэгээ гээд жилд дөрвөн удаагийн цэвэрлэгээ хийгддэг. Энэхүү цэвэрлэгээний ажилд 20 гаруй засварчин, инженер техникийн ажилтан, лаг хагшаас ачих машин, ус шугам хоолой угаах өндөр даралтат машинтайгаар оролцдог юм.

Жил бүр л замын хажууд ахуйн хогтой холилдсон шаврыг уул шиг овоолсон байдгийг иргэд анзаардаг байх. Үүнийг араас нь машин ачиж авдаг юм. Өчигдөр Нисэх, Яармагийн замыг цэвэрлэж байх үеэр цахим орчинд буруу мэдээлэл цацагдсан байна. Ус зайлуулах шугам, хоолойгоос гарсан лаг хагшаасыг араас нь машин ачиж, Цагаандаваа болон Улаанчулуутын хогийн цэгт хүргэдэг.  

8,000 гаруй худгийг засварлах, шугам угсралтын ажил шөнийн цагаар ч хийгддэг.

Нарны замын ус зайлуулах суваг нь хажуугийн бордюрын нүхээр усыг гадагшлуулах, тагийг нь сөхөж лаг хагшаасыг цэвэрлэх хийцлэлтэй.

Замын хучилт тавих гээд бордюр өндөр тавьсан байх хэсгийг харсан иргэд хэт өндөр бордюртай байна гэхчлэн ажил хийж байх явцад буруу мэдээлэл цахим орчинд цацаж, нийгэмд бухимдал үүсгээд байх юм" гээд зам талбайн борооны ус зайлуулах шугам, үерийн хамгаалалтын далан руу хог хаяхгүй байхыг захив.

77200200 утсаар 24 цагийн турш иргэдээс борооны ус зайлуулах шугам, хоолойтой холбоотой гомдол мэдээллийг хүлээж авдаг байна.