ПАРИС 2024: Туркийн буудлагын тамирчин Юсуф Дикечийн зураг цахим орчинд од болов
Туркийн гар бууны тамирчин Юсуф Декичийн зураг цахим орчинд од болов. Өдгөө 51 настай турк эр тав дахь олимптоо оролцоод анхны медалиа авсан юм. Тодруулбал 10 метрийн хийн гар бууны холимог багийн дасгалд Севвал Ильяда Тарханы хамт мөнгөн медаль хүртжээ.
Чихэвч, нүдний хаалт, линзгүй, гараа халаасандаа шургуулаад энгийн нүдний шилтэй зогсох түүний зураг Х платформд нэг өдрийн дотор 60 сая хандалт авчээ.
Олимпын буудлагын төрөлд оролцож буй ихэнх тамирчин нүдний хаалт болон линзтэй оролцдог. Ингэснээр байг бүдгэрүүлэхгүй, линз нь илүү оновчтой харахад тусалдаг бол чихэвч нь орчны дуу шуугианыг дарахад нөлөөлдөг байна.
Хэдийгээр олимпоос анхны медалиа авсан ч Ю.Декич улсынхаа аваргаар олон удаа тодорч, гар бууны хэд хэдэн дасгалд рекорд эзэмшдэг. Тэр ч бүү хэл 2006 онд Армийн Дэлхийн Аварга Шалгаруулах Тэмцээн (ДАШТ)-ээр 25 метрийн гар бууны дасгалд алтан медаль хүртэхдээ 597 оноо авч, дэлхийн рекорд тогтоож байв.
Мөн ДАШТ-ээс таван медаль хүртсэний хоёр нь алтан медаль аж.
Эх сурвалж: USA Today
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
