Сирийн засгийн газар Курдийн зэвсэгт хүчинтэй эвсэх гэрээ байгуулжээ

Сирийн түр засгийн газар Даваа гарагт тус улсын зүүн хойд бүс нутагт хяналтаа тогтоосон Курдийн зэвсэгт бүлэглэлтэй эвсэх гэрээг байгуулжээ.

Мөргөлдөөнийг зогсоох, зэвсэгт хүчнийг нь Сирийн армид нэгтгэх зэрэг нөхцөлтэй уг гэрээг байгуулснаар нийслэл Дамаск хотод төвтэй засгийн газар улс орондоо бүрэн хяналт тогтоох боломж нээгдэж байна.

Гэрээг Сирийн ерөнхийлөгчийн үүрэг гүйцэтгэгч Ахмад аль-Шараа, АНУ-ын дэмжлэгтэй Курд угсаатнуудын тэргүүлдэг Сирийн Ардчилсан Хүч бүлгийн командлагч Мазлум Абди нар байгуулжээ.

Ингэснээр Сирийн түр засгийн газар энэ онд багтаан Ирак, Турк улсуудтай залгаа хилүүдийн бүх боомтуудыг болон тухайн бүс нутаг дахь нисэх буудлууд, газрын тос олборлолтын талбайнуудыг шилжүүлэн авахаар болж байна.

Бас Исламын Улс террорист байгууллагын 9,000 орчим гишүүн хоригдож байгаа шоронгуудыг хяналтдаа шилжүүлж авахаар болжээ.

Үүний хариуд Сирийн Курдүүд эх хэл дээрээ боловсрол эзэмших, сонгуульд санал өгөх зэрэг үндсэн хуулиар олгогдсон эрхүүдээ эдлэхээр болж байна.

Ассадын дэглэмийн үед Курдүүд эдгээр эрхээ хасуулсан байсан юм.

Мөн Сирийн иргэний дайны 14 жилийн хугацаанд дүрвэсэн курд үндэстнүүд гэр орондоо буцаж ирэх боломжтой болох гэнэ.

Олон үндэстэн угсаатнууд, шашны цөөнхүүдийн эх орон болсон Сири улсыг нэгтгэх нь Ассадын дэглэмийг түлхэн унагасан босогчдын хувьд тулгамдсан асуудал болоод байгаа.

Даваа гарагт Сирийн засгийн газар Ассадыг дэмжигчдийн дэгдээсэн зэвсэг бослогыг дарах ажиллагаа өндөрлөснийг зарласан юм.

Өнгөрсөн долоо хоногийн Пүрэв гарагт Газрын дундад тэнгисийн эргийн Латакиа мужид төв засгийн газрын цэргүүд Ассадыг дэмжигч исламын алавит урсгалын зэвсэгт бүлгийн отолтод орсноор мөргөлдөөн эхэлж байв.

Башар аль-Ассадын гэр бүл алавит урсгалд хамаардаг юм.

Хүний эрхийн байгууллагууд энэ мөргөлдөөний улмаас 1,130 хүн алагдсаны 830 нь энгийн иргэд байсныг мэдээлж байгаа.

Сирийн ерөнхийлөгч уг аллага нь Ассадын дэглэмийн үед эрхээ хасуулж байсан хүмүүсийн алавитуудаас авсан өшөө байсан гэж тайлбарласан юм.

Тэрбээр аллага үйлдсэн этгээдүүдийг олж шийтгэхээ амлаад байгаа.

Гэсэн хэдий ч энэ үйл явдал Сирид дахин иргэний дайн дэгдэх эрсдэлийг нэмэгдүүлж, гадаадын том гүрнүүд анхаарлаа хандуулаад байна.

“Хятад улс Сирийн нөхцөл байдлыг анхааралтай ажиглаж байгаа бөгөөд мөргөлдөөний улмаас энгийн иргэдийн амь нас олноор хохирсонд санаа зовниж байна” гэж Даваа гарагт Хятадын гадаад хэргийн яамны хэвлэлийн төлөөлөгч Мао Нин мэдэгджээ.

Тэрбээр Сирийн холбогдох талуудад зэвсэгт мөргөлдөөн, дайсагналаа зогсоож, энгийн иргэдийн аюулгүй байдлыг хангахыг уриалсан байна.

Ням гарагт АНУ-ын төрийн нарийн бичгийн дарга Марко Рубио “Бид Сирийн загалмайтнууд, друйдууд, алавитууд, курдууд зэрэг угсаатны болон шашны цөөнхүүдийн эрхийг хамгаалахын төлөө зогсох болно” гэж мэдэгдээд энгийн иргэдийн амийг бүрэлгэсэн этгээдүүдэд хатуу хариуцлага тооцохыг Дамаскийн эрх баригчдад уриалжээ.

Эх сурвалж: Associated Press