Энэ оны эхний хоёр сард өнгөрсөн жилийн мөн үеэс зургаа дахин их буюу 1.8 тонн алт экспортолжээ
iKon.MN
Гэрэл зургийг MPA агентлагийн онцгой зөвшөөрөлтэйгөөр ашиглав
2025 оны эхний хоёр сарын экспортын мэдээллийг Гаалийн Ерөнхий Газар(ГЕГ)-аас өчигдөр танилцууллаа.
Дурдсан хугацааны дүнгээр манай улс экспортод хоёр тэрбум ам.долларын бараа, түүхий эд гаргасан нь өнгөрсөн оны мөн үетэй харьцуулахад 10.5 хувиар буурсан үзүүлэлт болж байна.
Экспортын барааны нийт дүнд
- эрдэс бүтээгдэхүүн 1.7 тэрбум ам.доллар буюу 86.2 хувь;
- сувд, үнэт ба хагас үнэт чулуу, үнэт металл, гоёлын зүйлс, зоос 166.7 сая ам.доллар буюу 8.3 хувь;
- ургамлын гаралтай бүтээгдэхүүн 28.6 сая ам. доллар буюу 1.4 хувийг тус тус эзэлж эдгээр нь нийт экспортын дүнгийн 95.9 хувийг эзэлж байна.
Энэ оны эхний хоёр сард 1.8 тонн алт экспортолсон нь өмнөх оны мөн үетэй харьцуулахад зургаан дахин өссөн дүн боллоо. Зэсийн баяжмалын экспорт мөн 10.8 хувиар нэмэгджээ.
Харин энэ оны эхний хоёр сард 10.2 сая тонн нүүрсний экспортод гарсан нь өнгөрсөн оны мөн үеэс 3.5 хувиар бага байгаа юм. Түүнчлэн үхрийн махны экспорт 37.7 хувь, ямааны самнасан ноолуурынх 57.5 хувь буурчээ.
Анхааруулга
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
