Хүний аминд хүрсэн Америк XL буль дог нохойг Их Британид хориглох шийдвэр гаргах гэж байна

Пүрэв гарагт нэг хүн Америк XL буль дог нохойд бариулж амиа алдсаны дараа Их Британийн ерөнхий сайд Риши Сунак ийм үүлдрийн нохойг энэ оны сүүлээр хориглох төлөвлөгөөгөө танилцуулжээ.

Долоо хоног хүрэхгүй хугацааны өмнө Английн Бирмингэм хотод эгчтэйгээ цуг дэлгүүр явж байсан 11 настай охин мөн ийм үүлдрийн нохойд уруулсан юм.

“Энэ бол цөөн хэдэн муу сургасан нохойн асуудал биш, тухайн нохойн төрөлхийн зан авиртай холбоотой тул цаашид тэвчих боломжгүй болж байна” гэж Баасан гарагт цацсан видео мэдэгдэлдээ Сунак хэлжээ.

Пүрэв гарагт төв Англид гарсан эмгэнэлт явдлын дараа нэг эрэгтэйг хүн амины хэргийн сэжигтнээр баривчилсан тухай цагдаагийн албаныхан мэдээлсэн юм.

Америк XL буль дог нохойн үржүүлэг, худалдааг хориглохыг уриалдаг Bully Watch хөдөлгөөнийхний мэдээлснээр өнгөрсөн онд Британид бүртгэгдсэн нохойн халдлагын улмаас хүний амь үрэгдсэн нийт тохиолдлуудын талаас илүү хувь нь дээрх үүлдрийн нохойтой холбоотой байжээ.

Америкийн пит буль терьер, Стаффордшир терьер үүлдрийн нохдын дундаас гаргасан Америк XL буль дог нь анх 2014-2015 оны үед Британид үзэгдэж эхэлсэн ба сүүлийн жилүүдэд тоо нь эрчимтэй өсөж байгаа юм байна.

Ерөнхий сайд Сунак ийм үүлдрийн нохойг таних тодорхойлолтыг бэлдэх үүргийг цагдаагийн байгууллага болон мэргэжлийн хүмүүст өгчээ. Үүний дараа Британи даяар үржүүлэх, худалдаалахыг хориглох арга хэмжээг энэ оны сүүлээр авч хэрэгжүүлэхээр төлөвлөсөн байна.

Гэвч амьтны эрхийг хамгаалах байгууллагууд тодорхой нэг үүлдрийн нохойг хориглох нь зөв шийдэл биш болохыг анхааруулжээ.

Эдгээр байгууллагуудын энэ долоо хоногт гаргасан хамтарсан мэдэгдэлд нохой эзэмшигчдийн хариуцлагыг нэмэгдүүлэх, сургалтыг сайжруулах зэрэг зохицуулалт нэвтрүүлэхийг засгийн газартаа уриалсан байна.

Эх сурвалж: Reuters