"Манай улс мэдээлэл, технологийн чиглэлийн боловсон хүчний тоогоороо ойрын 20 жилийн хэрэгцээгээ хангаж чадахааргүй байна"
Харилцаа холбоо, мэдээллийн технологийн салбарын хамгийн том арга хэмжээ болох "ІСТ ЕХРО 2023” энэ сард зохиогдох байгаа талаар бид өмнө мэдээлсэн.
Уг үйл ажиллгааг танилцуулах хэвлэлийн хурлын үеэр тус салбарын боловсон хүчний асуудал ямар байгаа талаар Цахим Хөгжил, Харилцаа Холбооны Яам (ЦХХХЯ)-ны Төрийн нарийн бичгийн дарга Б.Батцэцэг дараах мэдээллийг өгсөн юм.
ЦХХХЯ-наас хийж байгаа судалгаагаар манай улс мэдээлэл, технологийн чиглэлээр одоогийн бэлтгэж байгаа боловсон хүчний тоогоороо ойрын 20 жилдээ хэрэгцээгээ хангаж чадахгүй дутагдалтай байгаа аж.
“Олон улсад хүлээн зөвшөөрөгдсөн сертификат авч чадсан боловсон хүчнийг диплом шаардахгүйгээр ажилд авна”
Мэдээлэл, технологийн салбарын боловсон хүчний хүртээмжийг зөв зохистой хангах хүрээнд олон улсад хүлээн зөвшөөрөгдсөн 12 төрлийн сертификатыг авч чадсан боловсон хүчнийг салбарын болон харьяа есөн байгууллагуудад бакалаврын диплом шаардахгүйгээр ажилд авах ЦХХХЯ-ны сайдын тушаал гарсан байна.
Мөн мэдээллийн аюулгүй байдлыг хангах, мэргэжилтэн бэлтгэх асуудлаар жилд 1,000 инженер бэлтгэх санамж бичгийг “HUАWEI” компанитай байгуулжээ.
Түүнчлэн зарим их сургуулийн сургалтын хөтөлбөрт өөрчлөлт оруулж энэ чиглэлийн хосолсон мэргэжилтнийг төгсгөх асуудлыг хэрэгжүүлж байгаа юм байна.
Харин "ICT EXPO 2023"-ийн хүрээнд ЦХХХЯ дээр өнөөдрөөс эхлэн хөрөнгө оруулагчид, хөгжлийн түншүүдтэй салбарын боловсон хүчний дутагдлыг нөхөх, хүртээмжийг нэмэх асуудлаар харилцан ойлголцох, хамтын ажиллагаа өрнүүлэх чиглэлээр уулзалтууд хийгдэж байгаа аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
29 СЭТГЭГДЭЛТЭЙ
|
