Хятад улс, Уолмарт хоёр импортын татвартай холбоотой үнийн өсөлтийг хувааж “залгих” ёстой гэж Трамп үзэж байна

АНУ-ын ерөнхийлөгч Дональд Трамп өчигдөр тус улсын жижиглэн худалдааны аварга компани Уолмартыг барааны үнийг өсгөхийн оронд өөртөө “шингээх” ёстой хэмээн шүүмжилжээ.

Трамп өнгөрсөн сард АНУ-ын гол худалдааны түнш орнуудын эсрэг худалдааны дайн зарласны улмаас америкчуудын өргөн хэрэглээний бараа бүтээгдэхүүний үнэ өсөх аюул тулгараад байгаа.

Пүрэв гарагт Уолмарт компани гадил жимснээс эхлээд хүүхдийн автомашины суудал хүртэл олон барааны үнэ өсөх магадлалтай болсныг үйлчлүүлэгчдэдээ анхааруулсан юм.

Энэ анхааруулга Трампыг бухимдуулсан бололтой.

“Уолмарт үнээ өсгөх шалтгааныг импортын татвараар зөвтгөхөө зогсоох хэрэгтэй. Уолмарт өнгөрсөн онд төсөөлж байснаас хавьгүй их буюу олон тэрбумын орлого олсон. Уолмарт, Хятад улс хоёр “ТАТВАРЫГ ЗАЛГИЖ”, үнэ цэнтэй харилцагчдаа хохироох ёсгүй. Би болон танай харилцагч нар харж байгаа шүү!!!” гэж Трамп сошиал хуудсандаа бичжээ.

Тэр бас дотоодын автомашин үйлдвэрлэгчдэдээ үүнтэй ижил анхааруулга өгч байсан юм.

Мичиганы Их сургуулиас явуулдаг хэрэглэгчдийн сэтгэл ханамжийн судалгааны үр дүн Баасан гарагт урьдчилсан байдлаар гарахад түүхэнд хоёрт орох доод хэмжээнд хүрсэн байв.

Тухайлбал судалгаанд оролцогчдын 75 хувь Трампын импортын татварын улмаас инфляц цаашид өсөх хүлээлттэй байгааг илэрхийлжээ.

Дөрөвдүгээр сард Уолмартын гүйцэтгэх захирал Даг Макмиллион тэргүүтэй жижиглэн худалдааны компаниудын төлөөлөгчид Цагаан ордонд ерөнхийлөгч Трамптай уулзахдаа худалдааны дайны эрсдэлийг анхааруулж байв.

Гэвч Трампын засаг захиргаа үүнийг нь хэрэгсээгүй юм.

Хятадад үйлдвэрлэсэн автомашины хүүхдийн суудлын үнэ $350 байснаа 29 хувиар буюу $100-оор өсөх төлөвтэй байгааг Уолмартын санхүү эрхэлсэн дэд захирал Жон Дэвид Рэйни сая анхааруулсан байна.

“Бид үнийг аль болох бага байлгахаар ажиллаж байна. Гэхдээ бидэнд төдийгүй өөр ямар ч жижиглэн худалдаа эрхлэгчдэд тэвчих хязгаар гэж байдаг юм” гэж тэр Пүрэв гарагт компанийнхаа эхний улирлын үр дүнг танилцуулах үеэр хэлжээ.

Трампын засаг захиргаа Хятад улсын бараа бүтээгдэхүүнд 145 хувийн импортын татвар ногдуулаад байснаа 90 хоногоор хойшлуулах шийдвэрийг саяхан гаргасан юм.

Эх сурвалж: Associated Press