Lufthansa компанийн нисгэгч ухаан алдаж унасны дараа онгоц нь автомат жолоодлогод шилжжээ

Өнгөрсөн онд Германы Lufthansa компанийн нэг нислэгийн үеэр гарсан асуудлыг шалгасан Испани улсын мөрдөгчид Бямба гарагт дүгнэлтээ танилцуулжээ.

2024 оны хоёрдугаар сарын 17-ны өдөр Франкфурт хотоос Севиллийн чиглэлд ниссэн Airbus A321 онгоц 10 минутын турш авто жолоодлогод шилжсэн шалтгааныг тэд шалгасан юм.

Тухайн үед онгоцны ахмад ариун цэврийн өрөөнд орохоор явсны дараа туслах нисгэгчийн бие муудаж, ухаан алджээ.

Үүний улмаас онгоц ахмадыг буцаж ирэх хүртэл 10 минутын турш автомат жолоодлогод шилжсэн нь тун азтай тохиолдол болсон байна.

Бас нэг асуудал нь нисгэгчдийн бүхээгийн хаалга энэ үеэр дотроосоо түгжигдсэн байжээ.

Ахмадыг буцаж ирэхэд туслах нисгэгч хаалгыг дотроос нь нээж өгөх ёстой байсан гэнэ. Хаалгыг нээхгүй байсан тул бүхээгийн ажилтнууд дотуур холбоогоор туслах нисгэгчтэй ярих гээд чадаагүй байна.

Нисгэгчдийн бүхээгийн хаалга онгоц барьцаалагчдыг нэвтрүүлэхгүй байх зорилгоор бүтээгдсэн байдаг тул хүчээр онгойлгох ямар ч боломжгүй ажээ.

Азаар онгоцны ахмад арван сарын өмнө онцгой тохиолдолд тусгай кодоор хаалгыг нээх аргыг заалгасан байсан нь энэ үеэр хэрэг болжээ.

Бүхээгт ахмадыг ороход туслах нисгэгчийн царай цонхийж, хөлөрч, үл ойлгогдох хөдөлгөөн хийж байсан тул онгоцыг Мадрид хотод буулгасан байна.

Онгоцны 199 зорчигч, бүхээгийн зургаан ажилтан эсэн мэнд газардаж, туслах нисгэгчийг эмнэлэгт хүргэж байжээ.

Туслах нисгэгчийн эрүүл мэндийн суурь асуудал олон удаагийн үзлэг шинжилгээгээр илрээгүй байсныг мөрдөгчид шалгаж тогтоосон байна.

Мөрдөгчид дүгнэлтдээ Европын Нислэгийн Аюулгүй Байдлын Агентлагт (EASA) дүрэм журмаа эргэж харахыг уриалсан байна.

Тухайлбал нисгэгчдийн аль нэг нь бүхээгээс түр гарах үед хоёр дахь хүнийг заавал үлдээдэг журамтай болохыг зөвлөжээ.

Lufthansa компанийн төлөөлөгч шалгалтын дүнтэй танилцсанаа баталж, болсон явдлын мөрөөр дотооддоо шалгалт явуулж байгааг мэдээлсэн байна.

Эх сурвалж: DPA