Трамп завгүй айлчлалынхаа завсраар поп од Тэйлор Свифтийг хэрүүлд дуудав

Энэ долоо хоногийн турш Ойрх Дорнодын баян орнуудаар айлчлаад завгүй байсан АНУ-ын ерөнхийлөгч Дональд Трамп поп од Тэйлор Свифтийг шинэ хэрүүлд дуудсан нь анхаарал татаж байна.

Тэрбээр өчигдөр Персийн булангаас буцах замдаа онгоцон дотроос “Намайг ‘Би Тэйлор Свифтийг үзэн яддаг’ гэж бичсэнээс хойш түүний нэр хүнд унасныг та нар анзаарсан уу?” хэмээн сошиал хуудсандаа бичжээ.

Трамп өнгөрсөн оны есдүгээр сард өөрийнх нь өрсөлдөгч Камала Харрисыг дэмжиж байгаагаа зарласных нь дараа дуучин бүсгүй рүү ингэж дайрч байсан юм.

Харин одоо яагаад тэр энэ хэрүүлээ сэргээхээр шийдсэн нь тодорхойгүй байна.

 

Сошиал орчинд олон сая дагагч, шүтэн бишрэгчтэй Свифтийг талдаа оруулах нь 2024 оны сонгуулийн үеэр Трампын хувьд чухал байсан юм.

Өнгөрсөн сард Супер Боулын тэмцээнд түрүүлсэн америк хөлбөмбөгийн Philadelphia Eagles багийн тамирчдыг Цагаан ордонд хүлээж авах үеэрээ Трамп бас Свифтийн нэрийг дурдаж байжээ.

Свифт өөрийн найз залуу Травис Кэлсийг дэмжихийн тулд дээрх тэмцээнийг биеэр очиж үзсэн юм. Трамп ч бас энэ тэмцээнийг үзэж байв.

“Би тэнд Тэйлор Свифттэй хамт байсан. Яаж ингэж болдог байна аа?” гэж Цагаан ордны хүлээн авалтын үеэр Трамп хэлж байжээ.

Одоо 35 настай Тэйлор Свифт манай гарагийн хамгийн баян хөгжмийн уран бүтээлч бөгөөд хөрөнгийн хэмжээг нь $1.6 тэрбум гэж тооцоолдог.

Тэрбээр Грэммийн 14 шагнал, MTV Video Music наадмын 30 шагналтай хүн юм.

Эх сурвалж: AFP