“Чингис хаан грант” тэтгэлэгт хөтөлбөрийн материал авах хугацаа дуусахад найм хоног үлджээ

Гэрэл зургийг MPA агентлагийн онцгой зөвшөөрөлтэйгөөр ашиглав

Чингис хаан болон Монголын эзэнт гүрний түүх, өв соёлын судалгааг гүнзгийрүүлэх, дэлхий дахинд Монголын түүхийн үнэ цэнийг түгээх, энэ чиглэлээр ажилладаг судлаачдыг олон улсын түвшинд дэмжих зорилготой "Чингис хаан грант" тэтгэлэгт хөтөлбөрийн сонгон шалгаруулалт тавдугаар сарын 22-нд эхэлж байв.

Уг тэтгэлэгт хөтөлбөрийн материал авах хугацаа дуусахад найм хоног үлдээд буйг Соёл, Спорт, Аялал Жуулчлал, Залуучуудын Яам(ССАЖЗЯ)-наас санууллаа. 

Тэтгэлгийн хүрээнд:

• Монгол Улсаас нэг судлаач – Кембрижийн Mongolia and Inner Asia Studies Unit(MIASU)-д ес хүртэлх сарын хугацаатай бүрэн тэтгэлэгтэй судалгаа хийх
• Монгол Улсаас нэг судлаач – Кембрижийн MIASU-д гурав хүртэлх сарын хугацаатай бүрэн тэтгэлэгтэй судалгаа хийх
• MIASU-д харьяалагддаг нэг судлаач – Монгол Улсад 3 хүртэлх сарын хугацаатай бүрэн тэтгэлэгтэй судалгаа хийх боломжтой юм. 

Тэтгэлэгт багтах зардлууд:

• Нислэгийн зардал – Энгийн ангиллын хоёр талын нислэг
• Амьдрах зардал – Кембрижийн их сургуульд судалгаа хийх монгол судлаачид сар бүр £2,500, Монгол Улсад судалгаа хийх Кембрижийн судлаачид сар бүр £1,000
• Орон сууц – Хоёр тал тус тус байр олоход дэмжлэг үзүүлнэ
• Визний зардал – Холбогдох бүх виз мэдүүлгийн төлбөр багтаж байна. 

Сонгон шалгаруулалт явуулах хугацаа:

• 2025 оны зургаадугаар сарын 24-нд: Өргөдөл хүлээн авах сүүлийн хугацаа (23:59 GMT)
• 2025 оны зургаадугаар сарын 30-нд: Сонгон шалгаруулалтын ярилцлага (цахимаар 09:00–13:00 UK, 16:00–20:00 Монгол)
• 2025 оны долдугаар сарын 1-нд: Тэнцсэн нэр дэвшигчдэд цахим шуудангаар мэдэгдэнэ
• 2025 оны аравдугаар сарын 1-нд: Судалгааны ажил эхэлнэ (Их Британи, Монгол Улсад зэрэг эхэлнэ).

Өргөдлийн маягт татаж авах холбоос: application_form.docx