АН-ын бүлэг шинээр томилогдсон Ерөнхий сайд Г.Занданшатарт ГУРВАН БАГЦ шаардлага хүргүүлжээ

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ дахь Ардчилсан Намын бүлгийн ээлжит хуралдаан өнөөдөр болж, Ерөнхий сайд Г.Занданшатарт гурван багц шаардлага хүргүүлэхээр болсон байна. 

Энэ талаар Ардчилсан Намын бүлгийн дэд дарга Б.Жаргалан "Ардчилсан Нам хүний эрх эрх чөлөөг хангах, эдийн засаг болон улс төрийн эрх чөлөөг баталгаажуулах үзэл баримтлалын хүрээнд тодорхой бодлого шийдвэр гаргаж ирсэн. 

Шинээр томилогдсон Ерөнхий сайд Баасан гарагийн өглөө Засгийн газрын бүтцээ оруулж ирнэ гэсэн амлалтыг чуулганы танхимд өгсөн. Даваа гарагт төсвийн тодотголоо оруулж ирээд ажилдаа орно гэсэн боловч одоогоор МАН-ын бүлэг хуралдаагүй, шинэ Ерөнхий сайд Засгийн газрын бүтцээ оруулж ирээгүй байна. 

Өнөөдөр манай улсад тулгамдсан маш олон асуудал бий. Шинээр томилогдсон Ерөнхий сайд бүтэц бүрэлдэхүүнээ яаралтай УИХ-д өргөн мэдүүлж, бодлогын тодорхой асуудлуудад шийдвэрээ гаргаж ажиллах шаардлагатай байна. 

1. Авлигын эх үндэс нь эдийн засаг дахь төрийн оролцоо хэт өндөр байгаа үйл явдал юм. Эхний ээлжид шинэ Ерөнхий сайд яам болон сайд нарын тоог 50 хувиар, төрийн захиргааны болон тусгай албан хаагчдын тоог 20 хувиар бууруулах, төрийн албаны мэргэшсэн тогтвортой байх нөхцөлийг хангаж, ашиг сонирхлын зөрчлийг таслан зогсоох шаардлага тавьж байна.
2. Төрийн өмчит аж ахуйн нэгжүүдийг олон нийтийн нээлттэй хувьцаат компани болгох, орон тоо хоёр дахин бууруулж, үр өгөөж бүтээмжийг эрс нэмэгдүүлэхийг шаардаж байна.
3. Төрийн хэмнэлтийг хэрэгжүүлэх замаар төрийн хүнд суртал, татварын дарамт, хяналт шалгалтаас бизнес эрхлэгчдээ чөлөөлж, хувийн өмч болон хөрөнгө оруулагчдын эрх ашгийг хамгаалах, хувийн хэвшилд ногдох татварын дарамтыг 20 хувиар бууруулах, 2025 онд 20 мянган ажлын байр шинээр бий болгох шаардлага тавьсан. 
4. 2025 оны улсын нэгдсэн төсвийг тодотгож, урсгал зардлыг 20 хувиар танах, төсвийн худалдан авалтын бодлогоор үндэсний аж ахуйн нэгжүүдийг дэмжих буюу тендерийг зөвхөн үндэсний компаниудын дунд зарлах, мега төслүүдийг эдийн засгийн үр өгөөжийн хувь эрэмбэлж, үр ашиггүй төслийг хасах. 
5. ДЦС-3 дээр гарсан ослын улмаас 2025-2026 оны өвөл цахилгаан дулаан хангамж дутагдах эрдлээс урьдчилан сэргийлж, салбарын реформыг бодитой хэрэгжүүлэх замаар эрчим хүчний хараат байдлыг бүрэн халах.

Монгол Улсын нэн тулгамдсан асуудлыг даруй шийдвэрлэх бодлогыг УИХ-д оруулж ирэх, Засгийн газрын бүтэц бүрэлдэхүүний хэмжээнд эдгээр асуудлыг тусгаж хэлэлцэх ёстой гэж манай бүлэг үзсэн" гэв.