Зохиолчид уншигчидтайгаа уулзан золгож, уншигчид дуртай номоо нэг дороос хямдралтай, урамшуулалтай үнээр худалдан авах боломжтой номын баяр өнөөдөр Д.Сүхбаатарын талбайд эхэллээ. 37 дахь удаагийн номын баяр нь өнөөдөр болон амралтын хоёр өдөр дуустал үргэлжлэх юм. 

Энэ жилийн номын баярын үеэр ном, соёлтой холбоотой олон талт үйл ажиллагааг олны хүртээл болгож, хүүхэд багачуудад зориулсан сонирхолтой арга хэмжээг зохион байгуулахаар төлөвлөжээ. 

Номын баярын үеэр ихэнх номын дэлгүүр, хэвлэлийн газар, зохиолчид номоо хямдруулдаг уламжлалаар Азхур номын дэлгүүрийн бүх ном 2+1 урамшуулалтай, Интерном номын дэлгүүрийн бүх ном 10-50%, Мир ном хэвлэлийн газрын номууд 20%-ийн болон өөр бусад олон хямдрал, урамшууллуудтай байна. 

Жил бүрийн уламжлал ёсоор хуучин номын худалдаа ч гарсан байна. Энэ жилийн тухайд тойрсон гурван эгнээгээр асруудаа засжээ. 

Д.Цоодол: Номын баяр бол зохиолчдын хувьд урам зориг, дэмжлэг юм

 

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Төрийн соёрхолт, Ардын Уран Зохиолч, Соёлын Гавьяат Зүтгэлтэн Д.Цоодол "Би залуу байхдаа хөдсөн дээлтэй ард түмнийхээ буянаар гадаад орон руу их явсан ч номын баяртай олон таарч байсангүй. Иймд манай улсад болдог энэ баярыг чамлаж болохгүй. Цаашид улам сайхан болно. Энэ бол зохиолчдын хувьд урам зориг, дэмжлэг юм. Юм мэдье гэвэл ном унш гэж залуучууддаа хэлье. Сошиалыг хөөгөөд ул суурьтай мэдлэг, мэдээлэл авах нь учир дутагдалтай. Ном бол чамтай сугадалцаад явах үнэнч сайн нөхөр юм. Миний таньдаг сайн сайхан зүйл бодож, хийж бүтээж явдаг ихэнх хүмүүсийн амьдрал номтой холбоотой байдаг" гэв. 

Т.Галсан: Өөрсдөө хөдөс өмсөж, үр хүүхдээ нэхийд ороон харин номыг торгоор баринтагладаг хэдэн мянганы бичиг соёлтой ард түмэн билээ 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Ардын уран зохиолч, Соёлын гавьяат зүтгэлтэн, яруу найрагч Тангадын Галсан  "Монголын ард түмэн өөрсдөө хөдөс өмсдөг, үр хүүхдээ нэхийд өлгийддөг харин номыг торгоор баринтаглаж бурхныхаа зулай дээр залдаг хэдэн мянганы бичиг соёлтой билээ. Энэ жилийн номын баярт би есөн номтой ирснээс "Ертөнцийн гурвын А тэргүүт" боть, "Бэлгэ үгийн гурван боть" зэрэг номуудаа онцолж байна. Бэлэг үг гэдэг их учиртай. Жишээ нь сайхан эмээл сайн хүнээс авахдаа "Зээ! Наран саран мэт ах дүү хоёр бүүрэгтэй, навчис дэлгэрсэн мэт алаг хоёр гөрлөмтэй энэ сайхан эмээл эрдэнэт хүлэгтээ жигүүрт болтугай, эзэн хүндээ буян болтугай" гэж хэлдэг.  Түүнчлэн хүний харласан сэтгэлийг сүлэхээр хагацал үзсэн айлд ороод "Зээ! буянтай сайхан буурал бурхны дэргэд морилжээ", "Эрдэнэт хүний сайн төрлийг олоод эргэж удамдаа ирэх гэж байна" зэргээр хэлдэг үгс бий" гэв. 

До.Цэнджав: Юу ч мэдэхгүй цаасан дээр эрээчдэг хүмүүс их бий. Номыг маш сайн сонгож унших хэрэгтэй 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Соёлын гавьяат зүтгэлтэн, зохиолч Долгорын Цэнджав "Ном болгон сайн гэсэн үг биш. Ямар ч номыг маш сайн сонгож унших хэрэгтэй. Жинхэнэ чанартай утга уран зохиол гэдэг шал өөр байдаг. Юу ч мэдэхгүй цаасан дээр эрээчдэг хүмүүс их бий. Иймд тухайн ном ямар асуудлыг гаргасан, Монгол хэлээр баян тансаг бичиж чадсан эсэхийг нь харж сонгох хэрэгтэй. Хүнд юм өгдөг өгөөжтэй ном л хамгийн чухал юм. Миний хувьд 1911 оны хувьсгал, утга зохиол судлалын ном зэргээ уншигчдадаа санал болгож байна" гэв. 

ФОТО: