-Япон улсын Хирошима хотоос мэдээлж байна-

Япон улсын Хирошима хотод "Их долоо" бүлгэмийн дээд хэмжээний уулзалт өнөөдөр эхэлж байна.

Уг бүлгэмд багтдаг АНУ, Герман, Франц, Канад, Итали, Их Британи улсын төрийн тэргүүн нар Хирошима хотод өчигдөр хүрэлцэн ирсэн бөгөөд зохион байгуулагч орны хувьд Японы ерөнхий сайд Фүмио Кишида тэднийг угтаж, хүлээн авч уулзахдаа хүрэлцэн ирсэнд нь талархал илэрхийлсэн юм.

Харин өнөөдөр Японы ерөнхий сайд гэргийн хамтаар Хирошима хотын Энх тайван дурсгалын музейд хүндэт зочдоо албан ёсоор угтан авлаа.

Японы болон Их Британийн ерөнхий сайд нарын уулзалт хамгийн удаан үргэлжилжээ

Ерөнхий сайд Ф.Кишида өчигдөр эн түрүүнд Итали улсын ерөнхий сайд Жоржиа Мелонитой ойролцоогоор нэг цаг, дараа нь АНУ-ын Ерөнхийлөгч Жо Байдентай нэг цаг 10 минутын турш олон улсын нөхцөл байдал, хамтын ажиллагааны талаар санал солилцсон байна. 

Мөн дээд хэмжээний уулзалтын үеэр ярилцах асуудлуудын талаар санал бодлоо хуваалцжээ.

Хоёр талт уулзалтуудын хугацааг харвал Япон-Их Британийн удирдагчдын уулзалт хамгийн урт буюу 90 минут үргэлжилсэн байна. 

График, Хоёр талт уулзалтын хугацаа, ойролцоогоор

A Flourish data visualization

Эх сурвалж: Япон улсын Гадаад Харилцааны Яам

"Их долоо" бүлгэмийн дээд хэмжээний уулзалтад хүрэлцэн ирсэн зочид:

Америкийн Нэгдсэн Улс: Ерөнхийлөгч Жо Байден, гэргийн хамт

Холбооны Бүгд Найрамдах Герман улс: Канцлер Олаф Шольц, гэргийн хамт

Их Британи: Ерөнхий сайд Риши Сунак, гэргийн хамт

Итали: Ерөнхий сайд Жоржиа Мелони

Канад: Ерөнхий сайд Жастин Трюдо

Франц: Ерөнхийлөгч Эммануэл Макрон

Япон: Ерөнхий сайд Фүмио Кишида, гэргийн хамт

Мөн Европын Холбооны болон уригдсан улсуудын төрийн тэргүүн нар Хирошимад хүрэлцэн ирээд байна.