Орос улс Беларусийн нутагт тактикийн цөмийн зэвсэг байрлуулахаар болсныг Путин зарлав

Хөрш Беларусь улсын нутагт тактикийн цөмийн зэвсэг байрлуулахаар болсноо ОХУ-ын ерөнхийлөгч Владимир Путин өчигдөр зарлажээ.

Тэр бас Киевийн засгийн газар Өрнөдөөс ураны хаягдлаар үйлдвэрлэсэн хуяг нэвтлэгч сум хүлээж авбал адилхан сумаар өөрийн армийг зэвсэглэхээ мэдэгдсэн байна.

Энэ долоо хоногт Их Британийн засгийн газар Украинд ийм их бууны сум илгээхээр төлөвлөж байгаагаа мэдэгдсэн юм.

“Энд гайхаад байх юм байхгүй. АНУ олон арван жил ийм зүйл хийсээр ирсэн. Тэд тактикийн цөмийн зэвсгийг холбоотнуудынхаа нутаг дэвсгэрт байрлуулаад удаж байгаа” гэж Путин шийдвэрээ тайлбарлажээ.

Тэрбээр Беларусийн ерөнхийлөгч Александр Лукашенкотой энэ талаар тохиролцсоноо энэ үеэр хэлсэн байна.

Британиас хуяг нэвтлэгч сум нийлүүлэхтэй холбоотой асуудлаар Путин “Орос улс мэдээж хариу арга хэмжээ авах хэрэгтэй болно. Манайд ийм төрлийн сум хэдэн зуун мянгаараа байгаа. Бид үүнийгээ хараахан ашиглаж эхлээгүй байна” гэж ярьжээ.

Украины дайны хамгийн халуун цэг болоод байгаа Бахмут хотод Оросын армийн довтолгоо суларч эхэлсэн тухай мэдээ сүүлийн өдрүүдэд ирж байгаа.

Мөн Украины арми хаврын сөрөг довтолгоонд бэлдэж эхэлсэн тухай мэдээлж байна.

Бахмутын тулаанд голлох үүрэгтэй оролцож буй Оросын хувийн армийн Вагнер компани өнгөрсөн хугацаанд нэлээд их хохирол амссан гэдэг.

Тус компанийг үүсгэн байгуулагч Евгений Пригожин өчигдөр Телеграм сувгаар хийсэн мэдэгдэлдээ өнгөрсөн хугацаанд 5,000 орчим шоронгийн хоригдол гэрээт хугацаагаа дуусгаад эрх чөлөөтэй болсныг дурдсан байна.

Тэдгээрийн ердөө 0.31 хувь нь Украинд үүрэг гүйцэтгэх хугацаандаа гэмт хэрэг үйлдсэн болохыг тэр бас мэдээлжээ.

Украины шинэ сөрөг довтолгоог няцаахын тулд Оросын арми 400,000 орчим хүнийг нэмж цэрэгт дайчлахаар төлөвлөж байгаа талаар Блүүмбэрг агентлаг өчигдөр уг асуудалтай ойр ажилладаг эх сурвалжуудаас уламжлан мэдээлсэн байна.

Өнгөрсөн оны есдүгээр сард зарласан цэргийн хэсэгчилсэн дайчилгаа Оросын нийгэмд эмх замбараагүй байдал үүсгэж, олон зуун мянган эрчүүдийг эх орноосоо дүрвэхэд хүргэсэн юм. Энэ дайчилгааны хүрээнд 300,000 орчим алба хаагчийг Украинд илгээсэн ч тулааны талбарт тодорхой ахиц дэвшил гаргаагүй байгаа.

Эх сурвалж: AFP