Б.Гомбосүрэн: Туршилтын хугацаанд 37 түр тэмдэг байршуулж, алба хаагчид хөдөлгөөнийг хянана
Авто замын түгжрэлийг бууруулах зорилгоор Нарны хороолол орчим, ТЭЦ-4, Саппорогийн урд уулзварын хөдөлгөөнийг нэг чигт оруулах туршилт хийх болсон тухай өнөөдөр холбогдох албаныхан мэдээлэл өглөө.
Өнгөрсөн онд Механик, Тээврийн Сургууль(МТС) болон Гурвалжингийн гүүрний хөдөлгөөн зохион байгуулалттай холбоотой гомдол мэдээлэл Тээврийн Цагдаагийн Алба(ТЦА)-нд нийт 127 ирсэн байна. Үүнд МТС-ийн хоёр талын хөдөлгөөнийг авахгүй байгаа тухай гомдол зонхилжээ.
Тиймээс Улаанбаатар хотын хөдөлгөөний хамгийн сүүлд сийрдэг уулзвар болох МТС-ийн уулзварыг өөрчлөх хэрэгцээ шаардлага бий болж тооцоо судалгааны үндсэн дээр туршилтын үйл ажиллагааг 21 хоногийн хугацаанд явуулах гэж байна гэдгийг ТЦА-наас онцлоод иргэд жолооч нарт дараах мэдээллийг хүргүүллээ.
ТЦА-ны Замын хөдөлгөөний удирдлагын хэлтсийн дарга Б.Гомбосүрэн “Энэ өөрчлөлттэй холбоотойгоор нийслэлийн Замын Хөгжлийн Газраас 37 түр тэмдэг байршуулна. Тиймээс жолооч нар хөдөлгөөнд оролцохдоо энэхүү тэмдэг, тэмдэглэлийн заалтыг баримтлахгүй бол нэлээд осол аваар гарах, андуурах нөхцөл байдал үүснэ.
Үүнтэй холбоотойгоор нутаг дэвсгэр хариуцсан замын цагдаагийн нэгж болон ТЦА-наас Алтай хотхон, МТС-ийн хөдөлгөөн зохион байгуулалтад нийтдээ дөрвөн цэгт найман алба хаагч хоёр автомашинтайгаар үүрэг гүйцэтгэнэ.
Гурвалжингийн гүүрний хөдөлгөөн зохион байгуулалтад хоёр цэгт дөрвөн албан хаагч нэг автомашинтайгаар тухайн орчны тэмдэгтийн хэрэгжилтийг хангах, замын хөдөлгөөний аюулгүй байдлыг хангах чиглэлээр хяналт тавьж ажиллана” гэлээ.
