ШИНЖЭЭЧ: Хөгжлийн Банк ажлаасаа чөлөөлөгдсөн 14 хүнд 290 сая төгрөгийн тэтгэмж олгосон байна

Гэрэл зургийг MPA агентлагийн онцгой зөвшөөрөлтэйгөөр ашиглав

Хөгжлийн Банкны хянан шалгах түр хорооноос зохион байгуулж буй нотлох баримтыг шинжлэн судлах хоёр дахь шатны сонсгол өнөөдөр эхэллээ. 

Сонсголын үеэр "Монгол Улсын Хөгжлийн Банкны үйл ажиллагаанд аудитын хуулийн этгээдийн хийсэн "Хязгаарлалттай" дүгнэлтэд ажлаас чөлөөлөгдсөн 14 хүнд 192 сая төгрөгийн тэтгэмж, ажилтнуудад 98 сая төгрөгийн эрүүл мэндийн халамж, нийт 290.1 сая төгрөгийн тэтгэмжийн зардал олгосон нь МУ Засгийн газрын 2021 оны "Төсвийн хэмнэлтийн талаар авах зарим арга хэмжээний тухай" 43 дугаар тогтоол болон ТӨБЗГ-ын 2021 А-1/354 тоот "Албан даалгавар хүргүүлэх тухай"-д заасан хэмнэх зардлыг хэмнэж ажиллаагүй" гэх дүгнэлт гарчээ. 

Тэтгэмжийн зардал яагаад олгосон талаар УИХ-ын гишүүн Б.Энхбаяр Хөгжлийн Банкны захирал асан Н.Мөнхсүлдээс асуулт асуув.

-61 сая төгрөгийг Н.Мөнхсүлд та Хөгжлийн Банкны захирлаар ажиллаж байсан гэж авч байгаа юм уу?

-Би хөдөлмөрийн гэрээгээр ажилласан. Төлөөлөн удирдах зөвлөлөөс шийдвэр гаргаад өгсөн. Хөгжлийн Банкны удирдлагаар 2020 оны дөрөвдүгээр сараас 2021 оны наймдугаар сар хүртэл ажилласан. Хөгжлийн Банканд томилогдохоос өмнө Сангийн яаманд ажиллаж байсан. Одоо Сангийн яамны Төрийн сангийн газарт ажиллаж байгаа. Тухайн үед Сангийн яам Хөгжлийн Банкны хувьцаа эзэмшигч болсон. Тиймээс Сангийн яамны санал болгосноор Хөгжлийн Банкны удирдлагаар томилогдсон. 

-Ажлаас чөлөөлөгдсөн хүмүүст ямар учраас тэтгэмж өгөөд байна вэ? 

-Хөгжлийн Банканд намайг очиход 144 хүний орон тоотой байсан. Бүтцийн өөрчлөлт хийгээд 140 хүний орон тоотой болсон. Бүтцийн өөрчлөлтөд хамрагдсан хүмүүст хөдөлмөрийн хуулийн дагуу тэтгэмж олгосон байгаа. 

-Энэ хүмүүс огт ажилгүй болоод тэтгэмж аваад байгаа юм уу. Жишээ нь чөлөөлөгдсөний тэтгэмж гээд 15 сая төгрөг авсан Б.Анар буцаад Сангийн яаманд ажиллаж байна. 

-Тухайн хугацаанд ажилгүй байгаа гэсэн үг. Одоо бол ажилтай байгаа. 

ВИДЕО: