Финланд, Шинэ Зеландын ерөнхий сайд нар “адилхан эмэгтэй хүмүүс” учраас уулзаагүй гэв
Финландын ерөнхий сайд Санна Марин өчигдөр Шинэ Зеландын ерөнхий сайд Жасинда Ардернтай уулзаж, хоёр улсын харилцаа, хамтын ажиллагааны талаар ярилцсан байна.
Энэ нь Финландын ерөнхий сайдын Шинэ Зеландад хийсэн анхны айлчлал юм.
Уулзалтын дараа болсон хамтарсан хэвлэлийн хурлын үеэр нэг сэтгүүлч “Маш олон зүйлээр нийтлэг хүмүүс учраас та хоёрыг уулзаж байгаа гэж олон хүн бодож байна” гээд энэ талаар сэтгэгдлийг нь асуужээ.
42 настай Ардерн, 37 настай Марин нар дэлхийн төр засгийн тэргүүн нараас харьцангуй залуу, бас эмэгтэй гэдгээрээ ялгардаг юм.
“Барак Обама, Жон Ки нараас яагаад нас чацуутнууд учраас уулзаж байгаа юм уу гэж хэн ч асуугаагүйд би гайхаж байна. Мэдээж бид эрчүүд давамгайлдаг улс төрийн ертөнцөд ажиллаж байгаа. Энэ бол бодит байдал. Гэхдээ хоёр эмэгтэй хүн зөвхөн хүйс адил учраас уулздаггүй юм” гэж Ардерн сэтгүүлчийн асуултад нэлээд эгдүүцсэн байдалтай хариулжээ.
Түүний нэр дурдсан АНУ-ын ерөнхийлөгч, Шинэ Зеландын ерөнхий сайд асан эрхмүүд нэг онд, хэдхэн өдрийн зайтай төрсөн хүмүүс юм.
“Бид ерөнхий сайд нар учраас л уулзаж байгаа юм” гэж Финландын ерөнхий сайд Марин дараа нь нэмж хариулжээ.
Эх сурвалж: CNN
