Сансраас ирсэн 555.55 каратын хар алмаз эрдэнийг үнэ хаялцуулж зарна
Сансраас манай дэлхийд ирсэн гэгддэг 555.55 каратын хар алмаз эрдэнийн чулууны үнэ хаялцуулах наймааг Sotheby’s дуудлага худалдааны төв Дубай хотод эхлүүлжээ.
“The Enigma” (оньсого) гэж нэрлэсэн энэхүү ховор чулууг солир эсвэл дэлхийтэй мөргөлдсөн астероидтой (одой гараг) хамт сансраас ирсэн гэж үздэг.
Маш ховор уг чулууг Дубай, Лос Анжелес хотуудад нийтэд үзүүлсний дараа ирэх сард Лондон хотод үнэ хаялцуулж эзнийг нь тодруулах юм.
Sotheby’s төв хар алмаз эрдэнийн үнийг $7 сая хүрнэ гэж тооцоолжээ.
2.6-3.8 тэрбум жилийн өмнө бий болсон гэж үздэг чулуунаас манай гарагийн бус буюу од хоорондын орон зайнаас гаралтай химийн элементүүдийн ул мөр илэрдэг юм байна.
“Хүн төрөлхтөнд мэдэгдсэн маш ховор, тэрбумын настай сансрын гайхамшгийг эзэмших амьдралд нэг олдох боломж” гэж Лондон хотын үнэт чулууны мэргэжилтэн Никита Бинани уг дуудлага худалдааг нэрлэжээ.
555.55 каратын хэмжээтэйгээс гадна байгалиасаа 55 талсттай тул хар алмаз эрдэнийг Ойрх Дорнодын Хамса (арабаар тав гэсэн утгатай үг) буюу хамгаалагч сахиусны бэлэгдэлтэй зүйрлэж байгаа гэнэ.
Эх сурвалж: CNN
