"The MongolZ" баг өндөр чансаатай "IEM Dallas 2025" тэмцээний Playoffs шатанд шалгарлаа
Цахим спортын "Counter Strike 2" тоглоомын өндөр чансаатай "Intel Extreme Masters Dallas 2025" тэмцээн АНУ-ын Даллас хотноо гурав дахь өдрөө үргэлжилж байна.
Нийт нэг сая ам.долларын шагналын сантай тус тэмцээнд 16 баг хоёр хэсэгт хуваагдан тоглоно. Манай улсын "The MongolZ" багийн хувьд Азийн чансааны оноогоороо уригдан оролцож байгаа юм.
Тэд А хэсгээс Playoffs-д шалгарах эрхийн төлөө Европын "G2 Esports" багтай "Во3" (гурван "map"-аар ялагчийг тодруулах) журмаар тоглож, 2:0-оор хожлоо. Манай баг өөрсдийнхөө сонгосон "Inferno map" дээр 13:4-өөр хожсон. Үргэлжлүүлэн эсрэг багийн сонгосон "Dust II map" дээр 13:7 онооны харьцаатай ялалт байгуулж байна.
Ийнхүү "The MongolZ" баг "Intel Extreme Masters Dallas 2025" тэмцээний хасагдах буюу Playoffs шатанд шалгарлаа. Гэхдээ А хэсгээс нэгдүгээр байраар гарах эсэхээ Францын "Team Vitality" багтай маргааш 07:00 цагт (цаг нь өөрчлөгдөж магадгүй) тоглож шийдэх юм.
Хэрэв хожвол энэ тэмцээнийг шөвгийн дөрвөн багийн шатнаас үргэлжлүүлнэ. Харин хожигдвол шөвгийн зургаа буюу А болон В хэсгийн хоёр, гуравдугаар байрт шалгарсан багийн аль нэгтэй нь тоглоно.
"Intel Extreme Masters Dallas 2025" тэмцээнд түрүүлсэн баг 285,000 ам.доллар, аман хүзүүдсэн баг 150,000 ам.долларын шагнал хүртэх юм. Мөн тус тэмцээн дууссаны дараа "Counter Strike 2" тоглоомын Дэлхийн Аварга Шалгаруулах Тэмцээн (ДАШТ) буюу "BLAST.tv Austin Major 2025" зургаадугаар сарын 02-22-нд АНУ-д зохион байгуулагдана.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
11 СЭТГЭГДЭЛТЭЙ
|
