“Үнэгүй будаа иддэгээ гайхуулсан” хөдөө аж ахуйн сайдад Японы ерөнхий сайд хатуу сануулга өгөв

Иргэдийг бухимдуулах агуулгатай зүйл ярьсан хөдөө аж ахуйн сайддаа хатуу сануулга өгснийг Японы ерөнхий сайд Шигэрү Ишиба өчигдөр мэдэгджээ.

Сүүлийн саруудад тус улсад цагаан будааны үнэ эрс нэмэгдсэнтэй холбогдуулан засгийн газар стратегийн нөөцөөсөө зах зээлд нийлүүлж, үнэ тогтворжуулах арга хэмжээ авч байгаа юм.

Хөдөө аж ахуйн сайд Такү Это өнгөрсөн амралтын өдөр болсон нэг арга хэмжээний үеэр “Миний дэмжигчид надад маш ихийг хандивладаг тул би будаа худалдан авч үзээгүй. Бараг илүүдэл будаагаа зарах хэмжээний хандив өгдөг” гэж ярьжээ.

Ерөнхий сайд түүний ярьсан зүйлийг “маш их харамсмаар” гэж тодорхойлжээ.

Өнгөрсөн сарын байдлаар Японд цагаан будааны үнэ жилийн өмнөхөөсөө бараг хоёр дахин өссөн байв.

“Хөдөө аж ахуйн сайдын хийх ёстой ажил бол будааны үнийн хөөрөгдлийг шийдвэрлэх арга замыг санал болгох. Би түүнийг ийм шийдэл санал болгоно гэдэгт найдаж байна” гэж ерөнхий сайд Ишиба өчигдөр сэтгүүлчидтэй уулзахдаа хэлжээ.

Даваа гарагт сайд Это дахин мэдэгдэл хийхдээ худал зүйл ярьж, эхнэртээ зэмлүүлснээ хэлсэн юм.

“Тэр надад хандивын будаа дууссан тул будаа авахаар явснаа хэлсэн. Манай гэр бүл зөвхөн хандивын будаагаар амьдардаггүй юм байна” гэж тэр хэлжээ.

Өчигдөр тэр ерөнхий сайдтай уулзаж, хөдөө аж ахуйн сайдын албан тушаалаа үргэлжлүүлэн хашихаар болсныг мэдэгдсэн байна.

“Ерөнхий сайд надад маш хатуу үг хэлсэн. Бас халуун дулаан үг хэлж, эхлүүлсэн ажлынхаа үр дүнг харуулахыг надад даалгасан. Би нөөцийн будаа гаргах шийдвэрийг гаргасан хүмүүсийн нэг. Тиймээс та бүхний дэмжлэгтэйгээр би эхлүүлсэн ажлаа үргэлжлүүлэхийг хүсэж байна” гэж Это энэ үеэр хэлжээ.

2023 оны халуун цаг агаарын улмаас ургац муу гарсан, мөн өнгөрсөн оны “мега газар хөдлөлт”-ийн дуулианы улмаас иргэд их хэмжээгээр нөөцөлсөн зэрэг шалтгаануудын улмаас Японд будааны хомсдол үүссэн гэж үздэг.

Хөдөө аж ахуйн сайдын ярьсан зүйлийг Японы сөрөг хүчний зарим төлөөлөл “маш зохисгүй, тэвчих аргагүй, огцрох хэмжээний асуудал” хэмээн дүгнэж байв.

Эх сурвалж: AFP