АНУ-ыг хүлээлгүйгээр Оросын эсрэг шинэ хориг арга хэмжээг Европын Холбоо, Их Британи хоёр зарлалаа

Трамп, Путин нар тодорхой үр дүнгүй утсаар ярьсны маргааш Европын Холбоо, Их Британи хоёр АНУ-ыг нэгдэхийг хүлээлгүйгээр Оросын эсрэг эдийн засгийн шинэ хориг арга хэмжээгээ зарлалаа.

Уг хориг арга хэмжээ нь Оросын газрын тосыг тээвэрлэдэг “сүүдрийн флот” болон санхүүгийн компаниудын үйл ажиллагааг үлэмж хэмжээгээр хязгаарлахад чиглэж байгааг талууд мэдэгджээ.

Украины ерөнхийлөгч Володимир Зеленский “Хориг арга хэмжээ чухал бөгөөд үүнийг дайны гэмт хэрэгтнүүдэд бодитой мэдрүүлж байгаа хүмүүст би талархаж байна” гэж сошиал хуудсандаа бичсэн байна.

Сүүлийн өдрүүдэд Европын удирдагчид хориг арга хэмжээнд АНУ-ыг нэгдүүлэхээр ерөнхийлөгч Трампыг эрчимтэй лоббидож байсан юм.

“Бид Оросын талаас нэг зүйлийг хүлээж байгаагаа нэг бус удаа тодорхой хэлсэн. Энэ бол урьдчилсан нөхцөлгүйгээр нэн даруй гал зогсоох. Үүнийг хүлээж аваагүй учраас бид хариу арга хэмжээ авах ёстой. АНУ-ын түншүүд маань ч үүнийг тэвчихгүй байх гэж найдаж байна” гэж Германы гадаад хэргийн сайд Иоханн Вадефул өчигдөр Европын Холбооны гадаад хэргийн сайд нартай уулзахдаа хэлжээ.

Сэтгүүлчидтэй уулзахдаа Дональд Трамп ямар арга хэмжээ авахаа хэлэлцэж байгаа гэхээс илүү мэдээлэл өгөөгүй байна.

“Бид олон зүйлийг судалж байгаа. Удахгүй тодорхой болно” гэж тэр Капитолын ордноос гарах замдаа сэтгүүлчдэд хэлжээ.

Гурван жил гаруй хугацааны дараа Баасан гарагт Украин, Оросын төлөөлөгчид Истанбул хотод уулзсан ч гал зогсоох ямар нэг тохиролцоонд хүрч чадаагүй.

Даваа гарагт Дональд Трамп, Владимир Путин нар утсаар ярихдаа гал зогсоох асуудлыг хэлэлцсэн ч бас үр дүнд хүрээгүй юм.

Харин Путин дайн зогсооход бэлэн байгаагаа баталгаажуулсан ямар нэг санамж бичиг байгуулах санал тавьсан.

Өчигдөр ОХУ-ын гадаад хэргийн яамны хэвлэлийн төлөөлөгч Мария Захарова тус улс ямар ч тулган шаардалтад бууж өгөхгүйг анхааруулаад Путиний санал болгосон санамж бичгийг Украины талтай байгуулахад бэлэн байгааг мэдэгджээ.

“Одоо бөмбөг Киевийн талбайд байна” гэж тэр хэлсэн нь Украины хариуг хүлээж байгааг илэрхийлсэн хэрэг байлаа.

Өчигдөр Европын удирдагчид хориг арга хэмжээндээ АНУ-ыг нэгтгэх найдвар тасраагүй байгааг илэрхийлцгээсэн юм.

Францын гадаад хэргийн сайд Жан Ноэль Барро “Владимир Путиний империалист уран зөгнөлийг зогсооход хүчээ нэгтгэцгээе” гэж уриалжээ.

Их Британийн гадаад хэргийн сайд Дэвид Ламми “Энх тайван тогтоох хүчин чармайлтыг саатуулах нь зөвхөн Украинд үзүүлэх бидний дэмжлэг болон Путиний дайны машиныг зогсоох хориг арга хэмжээг хоёр дахин нэмэгдүүлэхэд хүргэх болно” гэж мэдэгдсэн байна.

Сүүлийн ээлжийн хориг арга хэмжээ нь Их Долоогийн орнуудын тогтоосон газрын тосны үнийн баррель тутмын $60-ын дээд хязгаарыг тойрч гарахын тулд Оросын ашигладаг “сүүдрийн флот” хэмээх тээвэрлэгч хөлгүүдийн эсрэг голлон чиглэж байгаа юм.

Европын Холбоо болон Их Британийн эрх баригчид энэ жил дэлхийн зах зээлд газрын тосны үнэ буурсан тул дээрх хязгаарыг цаашид нэмж бууруулахаар ажиллахаа амлажээ.

Эх сурвалж: Reuters