Холливүүдийн од Шон Пэн кино багийнхан бүгд вакцинжуулалтад хамрагдахаас нааш зураг авалтад оролцохгүй

Оскарын шагналт жүжигчин Шон Пэн улс төрийн сэдэвтэй “Gaslit” телевизийн шинэ цувралд ерөнхий прокурорын дүр бүтээж байгаа юм. Түүний гэргий Мартагийн дүрийг Холливүүдийн бас нэг од Жулиа Робертс бүтээжээ.

Уг цувралд оролцож байгаа уран бүтээлчдийн багийн гишүүд бүгд коронавирусийн эсрэг вакцинжуулалтад хамрагдахаас нааш зураг авалтад оролцохгүй болсныг нэрт жүжигчний төлөөлөгч Баасан гарагт мэдэгдсэн байна.

Цувралыг бүтээж буй NBC Universal компани зөвхөн жүжигчдийн хүрээнд заавал вакцинжуулалтад хамрагдсан байх шаардлага тавьсан ажээ. Харин Шон Пэн үүнийг хангалтгүй гэж үзээд зураг авалтад оролцож буй бүх багийнхныг вакцинжуулахыг шаардсан гэнэ.

Цувралын зургийг авч буй АНУ-ын Калифорни мужид сүүлийн үед Covid-19 халдварын тохиолдол нэмэгдэж байгаа. Хэрвээ NBC Universal компани жүжигчний шаардлагыг биелүүлэхгүй бол зураг авалтын ажил хойшлох төлөвтэй болжээ.

1970-аад оны Уотергэйтийн дуулиант хэрэг дээр сэдэвлэсэн “Gaslit” цувралыг уран бүтээлчид нь энэ оны сүүлээр үзэгчдэд хүргэх төлөвлөгөөтэй байна.

Эх сурвалж: CNN