"Хотын дарга бүхнийг өөрийнхөөрөө шийдээд байгаа юм алга"
Монополын эсрэг газраас Сэлбэ хотын ТЭЗҮ, худалдан авах ажиллагааг нийцэлтэй хэмээн дүгнэлт гаргасан буюу дотоодын барилгын компаниудын өрсөлдөөнийг хязгаарласан асуудал байгаагүйг хотын дарга Х.Нямбаатар өнөөдөр сэтгүүлчдийн асуултад хариулах үеэрээ хэллээ.
Үргэлжлүүлэн тэрбээр “Намайг хотын даргаар томилогдохоос өмнө хотод нэг ч том төсөл байгаагүй. Хотын дарга болоод Сэлбэ хот төслийн газрыг чөлөөлүүлсэн. Холбогдох хуулийг батлуулсан. ТЭЗҮ-ийг боловсруулсан. Европын зах зээлд ТЭЗҮ-ээ танилцуулж, хөрөнгө босгосон. Барилгачдын холбооныхныг шаардахад Сэлбэ хотын тендерт дотоодын барилгын компаниудын өрсөлдөөнийг хязгаарласан эсэх асуудлыг шалгуулахыг зөвшөөрсөн.
Монополын эсрэг газраас Сэлбэ хотын ТЭЗҮ, худалдан авах ажиллагааг нийцэлтэй хэмээн дүгнэлт гарсан буюу дотоодын барилгын компаниудын өрсөлдөөнийг хязгаарласан асуудал огт байгаагүй. Сэлбэ хотын ТЭЗҮ дээр хүмүүсийн сонирхоод байгаа бүх тооцоолол, худалдан авах ажиллагааны багц нь ч байгаа. Хамгийн чухал нь Европын зах зээлээс хөрөнгө босгоход хөрөнгө оруулагчдад итгэл үнэмшил төрүүлэхийн тулд ТЭЗҮ дээрээ бүх юмаа багтааж, танилцуулна гэдгийг ойлгох хэрэгтэй. Түүнээс хотын дарга бүхнийг өөрийнхөөрөө шийдээд байгаа юм байхгүй” гэв.
Сэлбэ дэд төвийн эхний ээлжийн 4,400 айлын орон сууцны барилгын ажил өнгөрсөн сард эхлээд байгаа билээ.
Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
