Apple компани ирэх сараас эхлэн студийн чанартай дуу хөгжмийг хэрэглэгчдэдээ сонсгохоор болжээ

Apple компанийн Apple Music үйлчилгээ ирэх сард хоёр томоохон шинэчлэл хийхээр болжээ.

Эдгээр нь Lossless audio болон Spatial audio юм. Lossless audio нь дуу хөгжмийг яг студид бичсэн чанараар нь ямар ч алдагдалгүй сонсох боломж.

Зургаадугаар сард эхлэхдээ 20 сая дууг ийм өндөр чанартай сонсгож эхлэх бол оны сүүлээр 75 сая дуутай болж өргөжих юм байна.

Apple Music үйлчилгээний хэрэглэгчид дээрх санг нэмэлт төлбөргүй ашиглахаар болжээ.

Lossless audio чанартай дуу хөгжмийг сонсохын тулд Apple төхөөрөмжийнхөө Settings->Music->Audio Quality хэсэгт нэвтэрч, тохируулах юм байна.

Хамгийн бага чанар нь CD quality буюу 16 bit, 44.1 kHz чанартай байх гэнэ. Үүнийг дээшээгээ 24 bit, 48 kHz хүртэл өсгөх боломжтой байна. Харин хамгийн дээд 24 bit, 192 kHz буюу “High-Resolution Lossless” чанартайг сонсохын тулд дан ганц Apple төхөөрөмж хангалтгүй DAC (Digital-to-Analog converter) төхөөрөмж нэмж залгах шаардлагатай ажээ.

Мэдээж чанар нэмэгдэх тусам дуу хөгжмийн хэмжээ томрох тул интернэтийн хурд өндөр байх шаардлагатай.

Spatial audio нь дуу хөгжмийн эх үүсвэрийн байрлал, хөдөлгөөнийг давхар мэдрүүлдэг формат юм. Өөрөөр хэлбэл гурван хэмжээст орон зайд дуу чимээг сонсоно гэсэн үг.

Apple компани уг форматыг нэвтрүүлэхдээ Dolby Atmos технологийг ашиглажээ.

Spatial audio дуу хөгжмийг Apple-ийн сүүлийн жилүүдэд үйлдвэрлэсэн iPhone, iPad, Mac төхөөрөмжүүд дээр тоглуулж болохоос гадна H1 болон W1 чиптэй AirPods, Beats чихэвчүүдээр сонсох боломжтой гэнэ.

Эх сурвалж: Apple