Шадар сайдтай холбоотой дуулианы дараа E-mongolia-аас иргэд ямар вакцин хийлгэсэн талаарх мэдээллийг харах боломжгүй болжээ
Коронавирусийн эсрэг ямар үйлдвэрийн вакцин хийлгэсэн талаарх мэдээллийг Е-mongolia цахим хуудсаас нээлттэйгээр харах боломжгүй болжээ.
Тодруулбал, манай улсад хоёрдугаар сарын 23-ны өдөр коронавируст халдварын эсрэг дархлаажуулалт эхэлснээс хойш өнөөдрийн байдлаар 414,382 иргэн дөрвөн төрлийн вакцин хийлгээд байна.
Бусад улс орны жишгийн дагуу вакцинжуулалтад хамрагдсан иргэдийг Дархлаажуулалтын цахим бүртгэлд бүртгэж, улсын хэмжээнд нэгдсэн сан үүсгэсэн бөгөөд иргэд вакцин хийлгэсэн мэдээллээ E-mongolia-аас хэвлэж авах боломжтой талаар албаныхан удаа дараа мэдээлж байв.
Түүгээр ч зогсохгүй, вакцинд хамрагдсан иргэдийн мэдээллийг E-Mongolia платформд байршуулж, лавлагаа олгох боломжтой болгосон. Лавлагаа нь англи, монгол хэл дээр хэвлэгдэх тул гадаадад зорчих иргэд тухайн лавлагаагаа үзүүлээд явах боломжтойг Эрүүл мэндийн сайд С.Энхболд мэдэгдэж байсан билээ
Үүний дагуу иргэд тус сайт руу нэвтэрч, ямар үйлдвэрийн вакцин хийлгэснээ чөлөөтэй харж болж байв.
Өөрөөр хэлбэл, Е-mongolia цахим хуудсын "Шалгах" хэсэгт регистрийн дугаар оруулахад хаана, хэзээ, ямар үйлдвэрийн вакцин хийлгэсэн талаарх түүхийг дэлгэрэнгүй харж болж байсан юм.
Зураг 1. Гуравдугаар сарын 18-ны өдөр вакцин хийлгэсэн талаарх мэдээллээ 29-нд шалгахад мэдээлэл ийнхүү дэлгэрэнгүй гарч ирж байв. (Зураг дээр дарж томруулж харах боломжтой)
Зураг 2. Дөрөвдүгээр сарын 6-ны өдөр шалгахад ямар үйлдвэрийн вакцин хийлгэсэн мэдээлэл харагдахгүй байна. (Зураг дээр дарж томруулж харах боломжтой)
Тэгвэл хэдхэн хоногийн өмнө уг мэдээллүүд мөн л харагдаж байсан юм.
Тодруулбал, УОК-ын дарга, Шадар сайд С.Амарсайханы эхнэр Ч.Ичинхорлоогийн ХӨСҮТ-рүү чөлөөтэй орж гарсан гэх мэдээлэл тарсан нь иргэдийн шүүмжлэлийг ихээр дагуулсан.
Шадар сайд С.Амарсайхан өөрийн гэргийг ХӨСҮТ-өөр ороод, гарснаас хойш өөр хүнтэй уулзалгүй мэргэжлийн байгууллагын зөвлөмжийг дагаж, эцэг эхийнхээ гэрт тусгаарлагдаж байгаа хэмээн гуравдугаар сарын 31-ний өдөр мэдэгдсэн ч түүний эхнэр гуравдугаар сарын 26-ны өдөр Налайх дүүргийн эмнэлэгт вакцин хийлгэсэн тухай мэдээлэл цахим сүлжээнд тарсан юм.
Ийнхүү өөрчлөлт орж байгаа талаар Харилцаа холбоо, мэдээллийн технологийн газар болон холбогдох албаныхан олон нийтэд хандсан ямар нэг мэдээлэл хийгээгүй байгаа гэдгийг тодотгох хэрэгтэй.
Ямартай ч Шадар сайдын эхнэр гамшгийн үеийн дэглэм зөрчин ХӨСҮТ буюу "Улаан" бүсэд нэвтэрсэн гэсэн мэдээлэл гарсны дараа ийнхүү дурын хүний регистрийн дугаарыг оруулж, вакцинжуулалтын талаарх дэлгэрэнгүй мэдээллийг нээлттэйгээр харж болж байсан бол өөрчлөлт орж, вакцины төрөл харагдахгүй, зөвхөн "баталгаажсан" гэдэг үг харуулдаг болжээ.
