COVID-19-ийн эсрэг вакцинжуулалтыг энэ явцаар хийвэл хүн амаа бүрэн хамруулахад 3.5 жил шаардагдах нь
Коронавирусийн эсрэг вакцинжуулалтыг хоёрдугаар сарын 23-нд албан ёсоор эхлүүлснээс хойш хоёр хоногт 3,112 хүнийг хамруулаад байгаагаа ЭМЯ өнөөдөр мэдээллээ. Өөрөөр хэлбэл, өдөрт дунджаар 1,556 хүнд коронавирусийн эсрэг вакцин хийжээ.
Засгийн газар уг вакцинжуулалтад хүн амынхаа 60%-ийг хамруулахаар төлөвлөсөн гэдгээ мэдэгдсэн. Тэгвэл энэ хурдаараа хэдийн хугацаанд төлөвлөсөн хүнээ бүрэн хамруулах боломжтойг бид тооцож үзэв.
Үндэсний статистикийн хорооны мэдээллээр 2020 оны арванхоёрдугаар сарын эцсийн байдлаар Монгол Улсын хүн амын тоо 3,358,800-д хүрсэн байна. Үүнээс вакцинжуулалтад 2 сая гаруй хүнийг хамруулах тооцоо гарч байгаа бөгөөд 4 сая гаруй тун вакцин шаардлагатай гэсэн үг.
Ийнхүү тооцвол 2 сая гаруй хүнийг вакцинжуулахад 1,295 өдөр буюу 3.5 жил зарцуулахаар харагдаж байгаа юм.
Засгийн газраас 2021 оны эхээр мэдээлж байснаар коронавирусийн эсрэг дархлаажуулалтад эрүүл мэндийн байгууллагын 12,000 орчим ажилтан оролцох бөгөөд тарилга хийх, гарч болох хүндрэлээс сэргийлэх, дархлаажуулалтын хамралтын түвшинг үнэлэх зорилгоор 8,000 орчим эмч, мэргэжилтнийг сургаж байгааг мэдээлж байв.
Эрүүл мэндийн сайд С.Энхболд "Defacto club"-ийн хэлэлцүүлэгт оролцох үеэрээ 2021 онд хүн амынхаа 60%-ийг бүрэн дархлаажуулахаар төлөвлөснөө мэдээлсэн.
Хэрэв түүний мэдээлсэнчлэн энэ онд багтаж дархлаажуулалтаа дуусгана гэвэл цаашид өдөрт дунджаар 6,500 хүнийг вакцинжуулалтад хамруулах буюу одоогийн хүчин чадлаа хоёр дахин нэмэх шаардлагатай болох нь.
Одоогийн байдлаар манай улсад
- БНЭУ-аас 150 мянган тун АстраЗенека вакцин
- БНХАУ-аас 400 мянган тун Синофарм вакцин ирсэн(100 мянган тун нь тус улсын БХЯ-наас манай БХЯ-нд бэлэглэсэн) бол
- ОХУ-аас эхний ээлжид 50 мянган тун Спутник V
- КОВАКС хөтөлбөрийн хүрээнд Pfizer-ийн 25,740 тун вакцин ирэх тооцоотой байгааг Эрүүл мэндийн сайд С.Энхболд мөн мэдээлсэн.
ДЭМБ одоогоор ОХУ болон БНХАУ-ын вакцинд зөвшөөрөл олгоогүй байгаа тул манай улс хоёр хөршөөс хандивласан Спутник V болон Синофарм вакциныг ХӨСҮТ-ийн Биобэлдмэлийн төвд хадгалж, албан ёсоор зөвшөөрсний дараа ашиглах юм.
Эрүүл мэндийн сайд С.Энхбол иргэдээ вакцинд хамруулах эрэмбийн талаар
- Төр болон хувийн хэвшлийн эрүүл мэндийн ажилтан 56,000 хүн,
- цагдаа 53,000 орчим,
- 50-аас дээш насны өндөр настан, архаг хууч, суурь өвчтэй эрхтэн шилжүүлэн суулгасан, гемодиализ, дараагийнх нь үйл ажиллагаа тогтвортой байх салбарын 20 хувьд хийнэ гэж байв.
Харин өнөөдөр Засгийн газрын ХММГ-ын дарга Ц.Ганзоригийн мэдээлснээр Монгол Улсын стратегийн ач холбогдолтой салбар болох батлан хамгаалах, хил гааль, дэд бүтэц, эрчим хүч, харилцаа холбоо зэрэг салбарын ажилтан, албан хаагчдыг ДЭМБ-аас хүлээн зөвшөөрсөн АстраЗенека вакцинаар дархлаажуулж байгаа аж.
Монгол Улс хамгийн түрүүнд АстраЗенека вакцинаар эрүүл мэндийн салбарын 56 мянган ажилтнуудыг гурав хоногт багтаан дархлаажуулахаар төлөвлөснөө анх мэдээлсэн бол хоёр өдрийн хугацаанд ийнхүү 3,112 хүнийг вакцинжуулаад байна.
