Ж.Бямбадорж: Бид Ази тивдээ хүний эрхийн хувьд харьцангуй гайгүй орны тоонд орно
Олон улсын хүний эрхийн өдөр өнөөдөр тохиож байна.
Энэ өдрийг тохиолдуулан Хүний эрхийн үндэсний комиссоос өнөөдөр мэдээлэл хийлээ.
Энэ өдрийг НҮБ-ын Ерөнхий Ассамблейн шийдвэрээр 1950 оноос тэмдэглэж эхэлсэн. Хүний эрхийг хангаж, хамгаалах үндсэн зарчмуудын нэг нь олон нийтийн оролцоог хангах явдал бөгөөд дэлхий нийтээрээ Тогтвортой хөгжлийн зорилгуудад хүрэхийн төлөө хичээн зүтгэж буй энэ цаг мөчид хүний эрхэм чанарыг хүлээн зөвшөөрч, хүний эрхийн түгээмэл соёлыг бэхжүүлэхэд хүн нэг бүрийн оролцоог хангаж гэмээнэ бид тогтвортой хөгжилд хүрч чадах юм хэмээн Хүний эрхийн үндэсний комиссын дарга Ж.Бямбадорж мэдээллийн үеэр хэлсэн юм.
Мөн тэрбээр “Угтаа бид Ази тивдээ хүний эрхийн хувьд харьцангуй гайгүй орны тоонд орно. Яагаад гэвэл хүний эрхийг хангах улс төрийн, хууль зүйн, эдийн засгийн гэх гурван баталгаа манай улсад бүрдсэн. Хөдөлмөрлөх эрхтэй холбоотой гомдол манайд хамгийн их ирдэг.
Дараагаар нь ажлын байрны төрөл бүрийн дарамт буюу бэлгийн дарамттай холбоотой гомдол их ирдэг. Мөн цагдан хоригдож байгаа хүмүүсийн асуудлыг бид өөрсдөө шийддэггүй. Холбогдох газрууд нь шийддэг.
Харин бид хөдөлмөрлөх эрхтэй гомдлуудыг бараг шийдэж байгаа. Шаардлага зөвлөмжийг хүргүүлж, заавал биелэлтийг авч байгаа. Мэдээж хэрэг Хүний эрхийн комисст мэдэгдлээ гээд гадуурхах явдал байдаг. Угаасаа бидний байж байгаа царай нь тэр.
Тиймээс байгаа газартаа айх аюулгүй, гачигдах зовлонгүй амьдралыг бий болгохын тулд эрхээ мэддэг, бусдын эрхийг хүндэтгэдэг, үүрэг хүлээгчдээс хариуцлага шаардлага идэвхтэй иргэн байхыг уриалж байна.
Хуулийн хүрээнд харьяалагдсан асуудлыг бид өөрсдийн хүрээнд шийдэж байгаа. Мөн асуудлуудыг хариуцдаг байгууллагууд руу нь шилжүүлж, ХЭҮК өөрөө хяналт тавьдаг. Иргэн Болороогийн хувьд тухайн хэрэг нь эрүүгийн хэрэг учраас холбогдох газрууд анхаарч ажиллаж байгаа.
Ер нь бол Улсын ерөнхий прокурорын дэргэд байсан мөрдөн байцаах алба зориуд татан буугдсанаас хойш, эрүү шүүлттэй, гэмт хэргийн өнгө аясыг өөрчилдөг явдал Монгол Улсад зүгээр л хэвийн үзэгдэл болсон. Би ингэж хэлснийхээ хариуцлагыг хүлээнэ” гэж хэллээ.
