-iKon.mn сайтын сэтгүүлч Г.Номин Бүгд Найрамдах Казахстан Улсаас мэдээлж байна-

Монгол, Казахстаны бизнес форумд монголын 60 гаруй компанийн төлөөлөл оролцож байна. Казахстаны талаас 160 орчим бизнесийн төлөөлөл, 45 албаны хүн, нийт 200 гаруй төлөөлөгч тус форумд оролцов.

 

Нур-Султан хотод зохион байгуулагдаж буй тус форумыг БНКазУ-ын ерөнхий сайд нээж үг хэллээ.

Казахстан бизнес эрхлэх боломж ихтэй улс

БНКазУ-ын Ерөнхий сайд А.У.Мамин “Казахстан бол бизнес эрхлэх боломж ихтэй улс гэдгийг хэлмээр байна. Өнгөрсөн онд гадаадын шууд хөрөнгө оруулалт эрс өсөж, олон улсын санхүүгийн агентлагууд ч Казахстан улсын эдийн засгийг эерэгээр дүгнэж байна. 

Бидний зүгээс бизнес эрхлэлтийг тогтвортой дэмжих бодлого барьж, шинээр бизнес эхлэхэд бүрдүүлэх материалын тоо, төрлийг багасгасан. 

Манай хоёр улс хамтын ажиллагаагаа хөгжүүлэхийн тулд тээврийн салбараа хөгжүүлэх шаардлагатай байгаа. 

БНКазУ-ын зүгээс Монгол Улсад барилга, дэд бүтцийн бүтээн байгуулалт хийх, хөрөнгө оруулах сонирхолтой байгаа гэдгийг бизнес эрхлэгчид та бүхэнд онцлон хэлмээр байна” гэв. 

Хүннү Айр компани Улаанбаатар-Алмата чиглэлд шууд нислэг хийхээр төлөвлөж байна

 

Монгол Улсын Ерөнхий сайд У.Хүрэлсүх “Улс хоорондын бат бөх харилцаан дээрээ суурилан худалдаа, хөрөнгө оруулалтыг нэмэгдүүлж, уул уурхай, мал аж ахуй, газар тариалан, хот төлөвлөлт, аялал жуучлалын гээд өргөн хүрээтэй салбарт эдийн засгийн хамтын ажиллагааг гүнзгийрүүлэхээр бид ярилцлаа.

Монгол, Казахстаны бизнес форум нь хоёр орны, эдийн засаг, бизнесийн харилцааг эрчимжүүлэн хөгжүүлэхэд томоохон түлхэц болно гэдэгт итгэлтэй байна. Өнгөрсөн хугацаанд Казахстан Улс бизнесийн тогтвортой орчин бүрдүүлж, өрсөлдөх чадвараа ахиулан эдийн засгийн хөгжлийн өндөр амжилтанд хүрч чадсаныг тэмдэглэн хэлэхэд таатай байна.

Энэ оны зургаадугаар сараас Казахстаны иргэний агаарын тээврийн СКАТ компани Нур-Султан-Улаанбаатар чиглэлд тогтмол нислэг үйлдэж эхэллээ.

Түүнчлэн Монгол Улсын агаарын тээврийн Хүннү Айр компани Улаанбаатар-Алмата чиглэлд шууд нислэг хийхээр төлөвлөж байна. 

Казахстаны бараа бүтээгдэхүүн, тухайлбал хөдөө аж ахуйн тоног төхөөрөмж, сэлбэг хэрэгсэл, нарийн хилэн бөс даавуу, алим жимс зэргийг манай ард түмэн олон жилийн өмнөөс хэрэглэж заншсан, чанар нь танигдсан бараа бүтээгдэхүүн юм.

Сүү, махны чиглэлийн “Казахын цагаан толгойт” үүлдрийн үхэр, газар тариалангийн зарим сорт, төрлийг бид Монголд нутагшуулан ажиллаж ирсэн туршлагатай. Эдгээр уламжлалт худалдаа, хамтын ажиллагааг цаашид улам бүр эрчимжүүлэн хөгжүүлэх боломжтой гэж үзэж байна” гэдгийг онцоллоо.

 Хоёр улсын нийт худалдааны эргэлт 35.7 сая орчим ам.доллар

Гэрэл зургийг mpa.mn

1992 онд дипломат харилцаа тогтоосон найрсаг харилцаатай манай хоёр улсын хувьд нийт худалдааны эргэлт 35.7 сая орчим ам.доллар байгаа. Экспорт, импортын бүтцийг харвал экспортод хүнсний бүтээгдэхүүн, адууны мах, хивс хивсэнцэр зонхилдог бол импортод гурилан бүтээгдэхүүн, цагаан будаа, янжуур голлож байна.

Тиймээс манай улс Төв Ази тэр дундаа Казахстан улс руу чиглэсэн бодлогоо эрчимжүүлэн, харилцаагаа шинэ түвшинд гаргаж, хамтарсан бизнесүүд бий болгохыг зорьж байгаа. Хамтарсан бизнесүүд хөгжих нь хоёр орон цаашдаа урт хугацаанд харилцаагаа хөгжүүлэх нөхцөлийг бүрдүүлнэ хэмээн Ерөнхий сайдын гадаад бодлогын зөвлөх Б.Мөнхжин хэлж байв.

Казахстан улсад Монгол Улсын 8,000 орчим иргэн оршин суудаг

 

Түүнчлэн өчигдөр болсон хоёр улсын Ерөнхий сайдуудын уулзалтын үеэр Казахстаны тал хөдөө аж ахуй, боловсрол, дэд бүтцийн салбар дахь худалдаа хөрөнгө оруулалтыг нэмэгдүүлэх хүсэлтэй байгаагаа илэрхийлж, тээвэр, ложистикийн сүлжээг өргөтгөх, хүнс, хөдөө аж ахуй, жижиг дунд, хөнгөн үйлдвэрийн салбарт хөрөнгө оруулалт хийх боломжтой хэмээн байр сууриа илэрхийлсэн.

Байгалийн баялаг ихтэй Казахстан улс газрын тосны нөөцөөр дэлхийд 12, чулуу нүүрс 9, уран, вольфром 1, хром, фосфор 2, тугалга, молибдены нөөцөөр 4 дүгээрт ордог. Тус улсын эдийн засгийн гол салбаруудад байгалийн хий, уул уурхайн ойлборлолт, машины үйлдвэрлэл, хөнгөн үйлдвэр, хүнс хөдөө аж ахуй, мал аж ахуй, газар тариалан орно. 

Манай улсаас 90 хоног хүртэл хугацаар визгүй зорчдог Казахстан улсад энэ он есдүгээр сарын 1-ний байдлаар Монгол Улсын 8,000 орчим иргэн оршин сууж байна.