Япон улстай аялал жуулчлалын салбарт хамтарна
Япон улсын Токио хотод “JATA 2018” олон улсын аялал жуулчлалын үзэсгэлэн нээгдлээ.
2018 оны есдүгээр сарын байдлаар Япон улсад аялагчдын тоо 28.6 саяд хүрч 4 их наяд 410 орчим тэрбум иенийн орлого олсон нь тус улсын автомашин, цахилгаан барааны экспортын дараа буюу 3 -т орсон нь аялал жуулчлалаас олсон орлого тус улсын эдийн засгийн тэргүүлэх салбарын нэг гэдгийг илтгэж байна.
Мөн Япон улсын иргэд гадаад улсад аялсан тоо нь 17,888 саяд хүрч 4.5 % өссөн үзүүлэлттэй байгаа нь Монгол Улсын хувьд Японы аялал жуулчлалын зах зээлээс жуулчин татах бүрэн боломжтойг харууллаа.
Үзэсгэлэнгийн нээлтэд БОАЖ-ын сайд Н.Цэрэнбат тэргүүтэй Монгол Улсаас Япон улсад суугаа Онц бөгөөд Бүрэн эрхт Элчин сайд Д.Батжаргал, БОАЖЯ-ны Аялал жуулчлалын бодлого зохицуулалтын газрын даргын үүрэг гүйцэтгэгч С.Баясгалан, НАЖГазрын дарга Д.Батсүх, МИАТ ХК-ны захирал Д.Баттөр, МАЖХолбооны ерөнхийлөгч Д.Гантөмөр болон бусад төлөөлөгчид оролцсон юм.
БОАЖ-ын сайд Н.Цэрэнбат Монгол Улс, Япон улстай аялал жуулчлалын салбарт хамтарч ажиллах бүрэн боломжтойг холбогдох албаныханд хэлж байв.
Энэ сарын 20-23 өдрүүдэд болох тус үзэсгэлэнд энэ жил 136 орны бус нутаг, Япон улсын 44 муж нийт 1,400 аялал жуулчлалын чиглэлээр үйл ажиллагаа явуулдаг төрийн болон төрийн бус, бизнес, олон улсын байгууллагууд оролцож байна.
Эх сурвалж: БОАЖЯ
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
