Б.Гүнбилэг: УИХ өнөөдөр Ерөнхийлөгчийн зааснаар буруу шийдвэр гаргачихлаа

Гэрэл зургийг MPA.mn

Өнөөдөр УИХ-ын нэгдсэн чуулганаар Үндсэн хуулийн цэцийн есөн гишүүний дөрвийг нь шинээр томилсон. Тодруулбал, Монгол Улсын Үндсэн хуулийн цэцийн гишүүн Д.Наранчимэгийн оронд Б.Буяндэлгэрийг, Н.Жанцангийн оронд Г.Туулхүүг, Т.Лхагваагийн оронд Ц.Нанзаддоржийг,  Д.Сугарын оронд Ш.Солонгыг томилоод байна. 

ҮХЦ-ийн есөн гишүүнийг гурвыг Улсын Их Хурал, гурвыг Ерөнхийлөгч,  гурвыг Улсын Дээд шүүхийн санал болгосноор Улсын Их Хурал зургаан жилийн хугацаагаар томилдог. 

Тэгвэл энэ удаад өмнөх Ерөнхийлөгчийн санал болгосон гурван хүний, УИХ-аас томилсон нэг хүний хугацаа дууссан учраас Ерөнхийлөгч Х.Баттулга цэцэд Б.Буяндэлгэр,  Г.Туулхүү, Ц.Нанзаддорж нарыг, УИХ-аас Ш.Солонгыг нэр дэвшүүлж түүнийг нь УИХ албажууллаа. 

"Үндсэн хуулийн цэц нь ардчилсан сонгуулиар гарч ирсэн парламентын баталсан хуулийг Үндсэн хуулийн нэр бариад тэр чигт нь хүчингүй болгох эсэх шийдвэр гаргадаг чухал институт" талаар хуульч О.Мөнхсайханы ярилцлагыг бид өнөөдөр хүргэсэн. Тэрбээр өнөөдөр томилогдсон дөрвөн хүн дөрвүүлээ цэцийн гишүүн байх нөхцөл шаардлагыг хангаж чадахгүй байгаа талаар ярьсан юм.

 

Тухайлбал, хуульч, доктор Б.Гүнбилэг "Үндсэн хуулийг тайлбарлах хүн бол улс төр, хууль зүйн онолын болон практикийн аль алины мэдлэгтэй байх ёстой гэсэн л санаа. Учир нь Үндсэн хуулийг уншихад улс төр, хууль зүйн мэдлэг шаарддаг. Хуульч хүн улс төрийн мэдлэггүйгээр Үндсэн хуулиа уншиж чадахгүй. Үндсэн хуулийн эрх зүй нь өөрөө ҮНДСЭН ХУУЛИЙН МЭДЛЭГ+УЛС ТӨРИЙН МЭДЛЭГ шаарддаг. Зүгээр хуулийн мэдлэг биш шүү.

Эсрэгэрээ улс төрч хүн Үндсэн хуулийн мэдлэггүйгээр Үндсэн хуулиа тайлбарлаж чадахгүй. Дээр нь Цэц нь өөрөө шүүх гэж байгаа учир хуулийн процесс ажиллагаа, арга зүй, техник эзэмшсэн байхыг шаардах учир ихэнхдээ мэргэжлийн хуульчид байна. (Харин явцуу хүрээнд түүхчилсэн тайлбар хийвэл, Ерөнхийлөгч байсан хүн ч Цэцэд сууж болно гэсэн санаа Үндсэн хууль батлагчид ярьж байсан тул заавал хуульч гэдэг дээр манай Үндсэн хуулийн шаардлага гарахгүй болчихдог).

Гэхдээ хамгийн гол санаа нь ҮНДСЭН ХУУЛИЙН МЭДЛЭГ+УЛС ТӨРИЙН МЭДЛЭГ-ийн тухай л Үндсэн хууль заасан. 

Гол нь өнөөдөр томилогдсон нэг хүн энэ заалтыг юу гэж ойлгож байна вэ? гэсэн чинь "Үнэнээ хэлэхэд улс төрөөр мэргэшиж ажилласан юм байхгүй. Тодорхой хэмжээний төсөөлөлтэй байгаа. Би нэг аймгийн Ардчилсан намын даргыг нэг жил хийсэн" гэж байгаа юм. Ямар их зориг вэ. 

Өөрийнхөө томилогдож буй ганц заалтаа бэлдэж, бэлдэж тайлбарлаж байгаа нь энэ. 

Нүдний эмчид бөөрөө үзүүлдэггүй л байхгүй юу. Өнөөдөр УИХ маань Ерөнхийлөгчийн зааснаар буруу тасаг руу буруу эмч явуулчихлаа даа" гэж байр сууриа илэрхийлсэн байна.

Та бүхэн хуульч О.Мөнхсайханы байр суурийг мөн ЭНД дарж уншаарай.