Өмнөд Солонгосын ерөнхийлөгчийг тойрсон дуулианд Самсунг гүнзгий холбогджээ

Өмнөд Солонгосын ерөнхийлөгч Пак Гын Хэгийн найз Чой Сүүн Силийн охинтой холбоотой ивээн тэтгэлгийн хэрэг Самсунг корпорацийг эвгүй байдалд оруулаад байна.

Өнгөрсөн жил Самсунг нь Core Sports International GmbH нэртэй зөвлөх компанид $18 саяыг хандивласан нь ерөнхийлөгчийн найз эмэгтэйн компани байжээ. Энэ ивээн тэтгэлгийг гол хүртэгч нь Чой хатагтайн 20 настай охин Чун Юү Ра байсан гэнэ. Чун Юү Ра нь Германд амьдарч, морин спортоор хичээллэдэг юм. Тэгвэл Өмнөд Солонгосын прокурор саяхан түүнийг баривчлах шийдвэр гаргаад байгаа.

Энэхүү ивээн тэтгэлгийн хариуд Самсунг ямар дэмжлэг ерөнхийлөгчөөс авсныг прокурор шалгаж байгаа юм. Ялангуяа өнгөрсөн жил Үндэсний Тэтгэврийн Сангийн удирдах зөвлөлд Самсунгийн үүсгэн байгуулагчдын гэр бүлээс сонгогдсон явдлыг холбогдуулан шалгаж байгаа аж.

2015 онд Самсунгийн байгуулсан гэрээ ёсоор тэд Германы Библис хотод оршдог морин спортын багийг ивээн тэтгэх байжээ. “Самсунг Морин спортын багийг ивээн тэтгэж 2018 оны Азийн Наадам, Дэлхийн Морин Спортын Наадамд тамирчдыг бэлтгэх зорилготой” гэж гэрээнд заасан байна.

Гэрээнд зааснаар нийт 6 тамирчин, 12 морийг ивээн тэтгэлгэд хамруулжээ. Гэвч Германд байдаг гэх энэ багт ердөө Чун Юү Ра болон түүний дасгалжуулагч л байдаг, өөр тамирчин байдаггүй нь тогтоогдсон байна.

 

Мөн Самсунгийн мөнгөөр Чун Юү Рад зориулан 1 сая еврогийн үнэтэй Vitana V нэртэй морийг худалдан авсан байжээ.

Морин спорт нь дэлхийд язгууртнуудын спорт гэгддэг бөгөөд Өмнөд Солонгост нийт 251 тамирчин бүртгэлтэй байдаг гэнэ. Самсунгийн үүсгэн байгуулагчдын гэр бүл энэ спорттой урт хугацаанд холбогдож ирсэн. Самсунгийн үүсгэн байгуулагчийн ач хүү, 48 настай Ли морин спортоор хичээллэж, 1980-аад оны сүүл, 1990-ээд оны эхээр Өмнөд Солонгосыг төлөөлөн хэд хэдэн олон улсын тэмцээнд оролцон медаль хүртэж байжээ.

Энэ дуулиантай холбоотойгоор Өмнөд Солонгосын морин спортын тамирчид ихээхэн бухимдаж байгаа гэнэ. Учир нь Чун Юү Ра нь тамирчныхаа хувьд хэн болохыг тэд мэддэг юм.

Чун Юү Рагийн дунд сургуулийн хичээлд суугаагүй өнгөрснийг нь цагаатгах хуурамч бичиг саяхны аудитын шалгалтаар Соёл, Спортын яамнаас илэрсэн нь дуулианд гал нэмээд байгаа ажээ.

Мөн Өмнөд Солонгосын үндэсний шигшээ багийн бүрэлдэхүүнд багтахын тулд ээжийнхээ нөлөөг ашиглаж байсан тухай шүүмжлэл гарсан байна.

Эх сурвалж: Reuters