Нүүрснээс эрчим хүч гаргах нь хуурай бүс нутгуудыг ногооруулж байна гэж дүгнэжээ

Цаг уурын өөрчлөлтийн гол буруутны нэгээр нүүрсхүчлийн хий үйлдвэрлэдэг цахилгаан станцуудыг нэрлэдэг. Тэгвэл шинэ судалгаагаар түүнд бас ашигтай тал байгаа гэнэ. Тодруулбал нүүрсхүчлийн хий агаар мандалд нэмэгдсэний үр дүнд манай дэлхийн хамгийн хуурай бүс нутгуудад ногоорох үзэгдэл ажиглагджээ.

Сүүлийн хэдэн арван жилд ажиглагдах болсон ногоорох үзэгдлийг судалж үзээд ийм дүгнэлт гаргасан талаар Индианагийн Их сургуулийн судлаачид мэдээлсэн байна.

Судалгаанд дурдсанаар “CO2 нэмэгдсэнээр хуурай болон чийглэг бүс нутгуудад хөрсний ус дунджаар 11 хувь нэмэгдсэнээс хуурай хэсгийнх нь илүү ихээр буюу 17 хувь нэмэгдсэн байна” гэжээ.

Сүүлийн хэдэн жилийн хиймэл дагуулаас авсан зурагнуудыг харьцуулж судлахад манай дэлхийн хуурай бүс нутгууд болох Газар дундын тэнгисийн сав, Ойрх Дорнод, Хятад, Монгол, Өмнөд Америкт ногоорох талбай нэмэгдсэн гэнэ.

Үүнд нөлөөлсөн бусад хүчин зүйлс, тухайлбал газрын ашиглалт өөрчлөгдсөн, хур тунадас нэмэгдсэн зэргийг тооцож үзсэн ч гарцаагүй нүүрсхүчлийн хийний өсөлт голлох хүчин зүйл болж байгааг тогтоожээ.

Нэрт физикч Фримэн Дайсон нүүрстөрөгчийн давхар ислийн ач холбогдлыг сүүлийн жилүүдэд ихээр онцлон сайшаах болсныг үүнтэй холбон тайлбарлаж байна.

Өнгөрсөн жил тэр өгсөн ярилцлагандаа “нүүрстөрөгчийн давхар исэл нь ургамалд маш хэрэгтэй. Зэрлэг ургамал болон фермерийн аж ахуйнуудад хоёуланд нь. Хэрвээ энэ багасвал ургамалд усны хэрэгцээ нь нэмэгддэг бол нэмэгдвэл ус бага хэрэглэдэг” гэж байжээ.

Гэвч энэ сэдэв эрдэмтдийн дунд маргаантай хэвээр байгаа бөгөөд зарим судлаачид хэдийгээр нэг хэсэгтээ үр ашигтай байх ч эцэстээ хэт дулаарлын сүүдэрт дарагдаж гамшиг учруулна гэж үзэж байгаа юм.

Эх сурвалж: Daily Caller