2016 оны хувьчлалаар ҮНЭД ХҮРЧ БОЛОХ 5 БАРИЛГА

Ирэх жил хувьчлагдах нийслэлийн өмчийг НИТХ-аар шийдвэрлэсэн билээ. Тогтоол нь гараагүй байгаа ч урьдчилсан байдлаар шийдвэр нь гарчихсан.

Одоогоор жагсаалтад 20 барилга, байгууламж байгаа бөгөөд эдгээрийг хувьчилснаар нийслэлийн төсөвт дор хаяж 46 тэрбум төгрөг төвлөрүүлэхээр байна.

Ингээд жагсаалтад буй 20 барилгаас дуудлага худалдаагаар хамгийн үнэтэй зарагдах магадлалтай ТАВАН барилгыг онцолж байна.

Эдгээр барилгын үнэлгээг хийлгэсний дараа дуудлага худалдааны доод үнийг зарладаг билээ. Одоогоор зөвхөн НИТХ-ын шийдвэр гарсан гэдгийг сануулъя.

НЭГ. “Усан спорт сургалтын төв” ОНӨААТҮГ 

 

Төв бассейн гэж нэрлэгдэж заншсан Усан спорт сургалтын төв нь 1986 онд МХЗЭ-ийн Төв Хорооны харъяа Хүүхэд, залуучуудын усан спорт сургалтын бассейн нэртэйгээр үйл ажиллагаагаа явуулж эхэлсэн.   

Тус төвийн барилга нь 240 хүний суудалтай үзэгчдийн танхим бүхий том бассейн, жижиг бассейн, цайны газар зэрэг нийт 18 өрөө тасалгаа бүхий 3,233 м² талбайтай хоёр давхар барилга юм.

7,390 м² эзэмшил газартай.

Гэхдээ энэ нь барилга биш хуулийн этгээдийн хувьчлал тул авсан хүн нь үйл ажиллагааны чиглэлийг өөрчлөх боломжгүй юм.

ХОЁР. Монголын хүүхдийн урлан бүтээх төвийн барилга

 

Хүүхдийн урлан бүтээх төвийн барилга нь Сүхбаатар дүүргийн 6 дугаар хорооны нутаг дэвсгэрт хуучнаар хүнсний 4 дүгээр дэлгүүрийн баруун талд байрлалтай бөгөөд 1958 онд “Монголын пионерийн ордон”-ы зориулалтаар баригдаж ашиглалтад орсон.

Барилга нь цутгамал бетон суурьтай, тоосгон хана, модон шувуу нуруутай төмөр дээвэртэй, 42 өрөө тасалгаатай, нийт 1,802.5 м2 талбайтай, гурван давхар барилга юм. Төвлөрсөн инженерийн шугам сүлжээнд бүрэн холбогдсон.

Монголын хүүхдийн урлан бүтээх төвийн балансанд бүртгэлтэй бөгөөд тус төв нь төрөл бүрийн дугуйлангийн үйл ажиллагаагаа явуулж, эзэмшиж ашиглаж байна.

6,820м2 эзэмшил газартай.

ГУРАВ. Соёлын төв өргөөний  барилгын “Г” корпус

 

Нийслэлийн Өмчийн харилцааны газрын балансанд бүртгэлтэй Соёлын төв өргөөний барилга нь Сүхбаатар дүүргийн 8 дугаар хорооны нутаг дэвсгэрт Засгийн газрын ордны зүүн урд талд байрлалтай бөгөөд 1987 онд “Шинжлэх Ухаан Техникийн Соёлын Ордон” нэртэйгээр баригдаж ашиглалтанд орсон.  

Соёлын төв өргөөний барилга нь А, Б, Г хэсгээс бүрддэг бөгөөд цутгамал бетон суурьтай, тоосгон хана, төмөр бетон хучмал дээвэртэй, 290 өрөө тасалгаатай, нийт 15,000 м2 талбайтай, 13 давхар барилга юм. Төвлөрсөн инженерийн шугам сүлжээнд бүрэн холбогдсон.

“Г” корпуст Шинжлэх ухааны академийн тэргүүлэгчдийн газар, Урлагийн ажилтны холбоо, Нүүдлийн соёл иргэншлийг судлах олон улсын хүрээлэн, Олон улсын Монгол судлалын холбоо, Төрийн хэлний зөвлөл, Нийслэлийн соёл урлагийн газар, Соёл урлагийг хөгжүүлэх сан, Соёл урлагийн хороо зэрэг улсын төсвөөс санхүүждэг шинжлэх ухаан соёл урлагийн анхдагч байгууллагууд  байрладаг.

ДӨРӨВ.  Нийслэлийн Өмчийн харилцааны газрын конторын барилга

 

Нийслэлийн Өмчийн харилцааны газрын конторын барилга нь Чингэлтэй  дүүргийн 1 дүгээр хороо, Жигжиджавын гудамжинд байрладаг бөгөөд 1952 онд баригдсан байна.

Тус барилга нь Нийслэлийн Өмчийн харилцааны газрын балансанд бүртгэлтэй, одоогоор Нийслэлийн Өмчийн харилцааны газар болон Баянзүрх дүүргийн прокурорын газар конторын зориулалтаар ашиглаж байна.

Цутгамал чулуун суурьтай, тоосгон ханатай, хамар хана нь дүнз модоор хийсэн, модон дам нуруутай, төмөр дээвэртэй, 2 давхар, 44 өрөө тасалгаатай, дулаан, цэвэр бохир усны төвлөрсөн системд холбогдсон, нийт 1,650 м2 талбайтай.

Нийслэлийн Мэргэжлийн хяналтын эрүүл ахуйн улсын байцаагчийн дүгнэлтээр барилгын өрөө тасалгаанууд мөөгөнцөртсөн эрүүл ахуйн шаардлага хангахгүй, цаашид ашиглах боломжгүй тухай мэдэгдсэн байна.

807м2 эзэмшил газартай.

ТАВ. НЗДТГ-ын Спорт заалны барилга

 

Нийслэлийн Засаг даргын Тамгын газрын балансад бүртгэлтэй спорт заалны барилга нь Чингэлтэй  дүүргийн 1 дүгээр  хорооны нутаг дэвсгэрт байрлалтай, 2001 онд ашиглалтад орсон, цутгамал төмөр бетон аяган суурьтай, 510 мм-ийн зузаантай тоосгон хана, нум хэлбэрийн металл ферм, угсармал төмөр бетон хавтан хучилт, төмөр дээвэртэй, шилэн блокон цонхтой.

Төвлөрсөн инженерийн шугам сүлжээнд бүрэн холбогдсон. Нийт 694.1 м2 талбайтай, нэг давхар барилга юм.

Тус барилга нь Нийслэлийн Засаг даргын Тамгын газрын конторын барилгын 2 дугаар давхраас хүзүүвчээр дамжин орох хаалгатай, 18х30 м хэмжээтэй заал, эмч, зохион байгуулагчийн болон хувцасны өрөө, ариун цэврийн өрөөтөй.

ХУВЬЧЛАГДАХ БАРИЛГУУДЫГ ХҮСНЭГТЭЭР ХАРУУЛАВ

Барилгуудтай холбоотой дэлгэрэнгүй мэдээллийг НӨХГ-аас авав.