“Хааны эрэлд”-ийн дайчид цэцэрлэг, сургуулийн барилгад засвар хийнэ

Энэ сарын 20-ны өдөр эхэлсэн “Хааны эрэлд” энхийг дэмжих олон улсын сургуулилт амжилттай үргэлжилж байна.

Монголын Зэвсэгт хүчний нэрийн хуудас болж буй “Khaan Quest” сургуулилтыг анх 2003 оноос зохион байгуулж ирсэн бөгөөд жил ирэх бүр оролцогч орнуудын тоо өсч, хамрах хүрээ нь өргөжин тэлсээр байгаа.

Сургуулилтад:

1. Монгол
2. Америк
3. Канад
4. Өмнөд Солонгос
5. Энэтхэг
6. Франц
7. Бангладеш
8. Индонези
9. Япон
10. Непал
11. Тажикистан
12. Пакистан
13. Их Британи Умард Ирландын нэгдсэн вант улс
14. Сингапур
15. Герман
16. Унгар
17. Австрали
18. Чех
19. Тайланд
20. Хятад
21. Польш
22. Турк
23. ОХУ
24. Беларусийн 1200 орчим цэрэг дайчид оролцож байгаа ба дараах төрлүүдээр хамтарсан сургуулилт хийж, туршлага солилцон, спорт, урлагийн арга хэмжээ, хүмүүнлэгийн үйлст ч хамтран оролцож байна.

• Эмнэлгийн хамтарсан ажиллагаа
• Барилгын хамтарсан ажиллагаа
• Команд штабын сургууль
• Салааны түвшний хээрийн сургалт дадлага

Энэ удаагийн сургуулилтад оролцогч орон орны 60 орчим эмч нараас бүрдсэн эмнэлгийн баг СХД-ийн 6000 орчим иргэнд эрүүл мэндийн үзлэг үйлчилгээ үзүүлнэ. 

Мөн цэргийн барилга, инженерийн бүрэлдэхүүн хүүхдийн цэцэрлэг, дунд сургуулийн барилгад зарим засвар шинэчлэлийн ажил гүйцэтгэж, иргэдийн ундны усны байрыг барьж хүлээлгэн өгөх ажээ. 

Ийнхүү зүс царай, хэл соёл ондоо ч даян дэлхийн энхийн үйлст хамтран зүтгэхээ дахин нотлон харуулахаар хуран цугларсан дайчин эрсийн хамтарсан сургуулилт үргэлжилж байна.