Украины хотуудыг чиглэсэн Оросын томоохон агаарын довтолгооны дараа Трамп Путинийг “галзуурсан” гэж дүгнэв

Өчигдөр Оросын тал дайн эхэлснээс хойших нэг удаагийн хамгийн том агаарын довтолгоогоо Украины нутаг дэвсгэрт явуулжээ.

Тухайлбал Ням гарагийн шөнө Оросын арми нийт 367 ширхэг нисгэгчгүй онгоц, пуужингаар Украины хотуудад довтолсны улмаас 12 хүний амь үрэгдэж, олон арван хүн шархадсан байна.

Энэхүү халдлагын дараа АНУ-ын ерөнхийлөгч Дональд Трамп хатуу үгээр ОХУ-ын ерөнхийлөгчийг шүүмжилсэн нь ховор үзэгдэл байлаа.

“Түүнд яг юу тохиолдоо вэ? Тэр маш олон хүний амийг хөнөөж байна. Тэр үнэхээр галзуурчээ!” гэж Трамп сошиал хуудсандаа харамсан бичжээ.

Трампын мэдэгдлийн өмнө Украины ерөнхийлөгч Володимир Зеленский дээрх халдлагын дараах Вашингтоны нам гүм байдал нь Путинийг улам зоригжуулж байгааг шүүмжилж, Оросын эсрэг хориг арга хэмжээгээ чангатгахыг уриалсан юм.

Ням гарагийн орой Нью Жерсид сэтгүүлчидтэй уулзсан Трамп “Би түүнийг (Путин) эртнээс мэддэг, үргэлж найрсаг харилцаатай байсан. Гэхдээ тэр хотууд руу пуужин харваж, хүмүүсийг алж байгаа нь надад огтхон ч таалагдахгүй байна” гэж хэлжээ.

Дараа нь сошиал хуудсандаа “Тэр Украины нэг хэсгийг биш, бүхлээр нь авахыг хүсэж байгааг би үргэлж хэлдэг байсан. Энэ нь батлагдаж байх шиг байна. Хэрвээ ингэвэл Орос улс сүйрэх болно!” гэж анхааруулсан байна.

Энэ мэдэгдэлдээ Трамп бас Украины ерөнхийлөгч Зеленскийг хатуу үгээр шүүмжилжээ.

“Түүний ярьж байгаа зүйлс эх орондоо ямар ч тус нэмэр болохгүй байна. Түүний амнаас гарсан үг бүр асуудал үүсгэдэг. Энэ надад таалагдахгүй байна. Үүнийгээ зогсоосон нь дээр” гэж тэр Украины ерөнхийлөгчид хаяглан бичсэн байна.

Өнгөрсөн долоо хоногт Трамп, Путин нар хоёр цагийн турш утсаар ярьсан ч дайны галыг зогсоох талаар ямар нэг үр дүнд хүрээгүй.

Дараа нь Европын холбоотнууд АНУ-ыг нэгдэхийг хүлээлгүйгээр Оросын газрын тосны экспортын эсрэг хориг арга хэмжээгээ зарласан юм.

Тавдугаар сарын 16-нд Истанбулд уулзсан Украин-Оросын төлөөлөгчид гал зогсоох чиглэлд ахиц гаргаагүй ч олзны хүмүүсээ солилцох тохиролцоонд хүрсэн нь өнгөрсөн гурван өдөр хэрэгжиж дууссан байна.

Эх сурвалж: BBC