Илон Маскийн Starlink-тэй өрсөлдөх Амазоны хиймэл дагуулуудын эхний хэсэг сансарт хөөрлөө

Тэрбумтан Жэф Безосын санаачилсан Амазоны Kuiper өндөр хурдны интернэт холболтын үйлчилгээний эхний 27 хиймэл дагуул Даваа гарагт Флоридагаас сансарт хөөрчээ.

Энэ нь Америкийн өөр нэг тэрбумтан Илон Маскийн нэвтрүүлээд байгаа Starlink үйлчилгээний өрсөлдөгч юм.

Амазон компани цаашдаа нийт 3,236 хиймэл дагуулыг дэлхийн бөмбөрцгийн нам өндрийн тойрог замд байрлуулах зорилготой байгаа.

2019 онд зарласан энэ төсөлдөө Безос $10 тэрбумыг төлөвлөжээ.

Kuiper төслийн хиймэл дагуулуудыг Boeing, Lockheed Martin компаниудын хамтарсан компани United Launch Alliance компанийн Atlas V пуужин Флоридагийн Канавералын хошуунаас тээвэрлэн хөөрсөн юм.

Энэ хөөргөлт дөрөвдүгээр сарын 9-нд анх төлөвлөгдсөн байсан ч цаг агаарын байдлаас шалтгаалан хойшлоод байжээ.

АНУ-ын Харилцаа Холбооны Хорооноос олгосон зөвшөөрлийн дагуу Амазон компани 2026 оны дундаас өмнө нийт хиймэл дагуулуудынхаа талыг хөөргөх ёстой. Гэвч хэрэгжилт удааширсан тул зөвшөөрлийн хугацаагаа сунгах хүсэлт гаргаж магадгүйг мэргэжилтнүүд хэлж байна.

Хэдэн өдрийн дотор Амазон компани хөөргөсөн бүх хиймэл дагуулуудтайгаа холбоо тогтоох ёстой. Хэрвээ амжилттай болбол энэ оны сүүлээр эхний хэрэглэгчдээ холбож эхлэх юм байна.

Илон Маскийн SpaceX компани 2019 оноос хойш Starlink үйлчилгээний 8,000 гаруй хиймэл дагуулыг дэлхийн тойрог замд оруулаад байгаа.

Даваа гарагт тус компани зөвхөн Starlink үйлчилгээний хиймэл дагуулуудыг тээвэрлэхэд зориулж 250 дахь удаагаа пуужин хөөргөсөн юм.

Одоо Starlink нь дэлхийн 125 оронд нэвтэрч, таван сая гаруй хэрэглэгчтэй болоод байна.

Амазоны үүсгэн байгуулагч Жэф Безос энэ оны нэгдүгээр сард хэвлэлд ярихдаа хиймэл дагуулын интернэтийн зах зээл “хангалттай их” тул Starlink-тэй өрсөлдөх боломжтой гэж үзэж байгаагаа илэрхийлсэн юм.

Амазон 2023 онд Kuiper төслийнхөө хэрэглэгчийн хүлээн авагч төхөөрөмжүүдийг анх удаа нийтэд үзүүлж байв.

Тэдгээрийн том нь пянзны хэмжээний антеннтай байсан бол жижиг нь Амазоны электрон ном Kindle-ын хэмжээтэй байсан юм.

Тус компани нэг бүр нь $400 хүрэхгүй үнэтэй ийм төхөөрөмжүүдийг хэдэн арван саяыг үйлдвэрлэхээр төлөвлөжээ.

Эх сурвалж: Reuters