Олон улсын мастер Б.Мөнгөнтуул ОХУ-ын Полина Шуваловатай тэнцлээ
Энэтхэгийн Пуна хотод үргэлжилж буй шатрын гранпри тэмцээний найм дахь өрөгт олон улсын мастер Б.Мөнгөнтуул ОХУ-ын олон улсын мастер Полина Шуваловатай эвийн гэрээ байгууллаа.
Манай шатарчин эхний гурван өргийн дараа хоёр хожилтой байсан ч сүүлийн дөрвөн өрөг дараалан хожигдсон юм.
Харин энэ удаад тэнцсэнээр 2.5 оноогоор хүснэгтэд Гүржийн Салом Мелиа, орос гаралтай польш шатарчин Алина Кашлинская нартай ижил оноотой X байрт явна.
Тэмцээний сүүлийн өрөгт манай тамирчин Энэтхэгийн их мастер Харика Дронавалитай ухаанаа уралдуулна. Тэрбээр найман өргийн дараа 4.0 оноогоор V бичигдэж байна.
Эхний зургаан өргийн дараа тэмцээнийг хожигдолгүй тэргүүлж байсан БНХАУ-ын их мастер Жу Циньэр долоо дахь өрөгт Энэтхэгийн их мастер Хампи Конеруд дийлдсэн юм.
Улмаар найм дахь өрөгт хятад бүсгүй өрсөлдөгчөө хожсон бол Х.Конеру А.Кашлинскаятай оноо хуваасан аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
