Путиний гал зогсоох шийдвэрийг Оросын арми 2,000 гаруй удаа зөрчсөнийг Украины тал мэдээлэв

Улаан өндөгний баярыг тохиолдуулан Украины фронт дээр 30 цагийн хугацаанд гал зогсоох нэг талын шийдвэрийг ОХУ-ын ерөнхийлөгч Владимир Путин өнгөрсөн Бямба гарагт зарлаж байв.

Уг хугацаа нь Москвагийн цагаар Ням гарагийн шөнө дунд хүртэл үргэлжлэх байсан юм.

Ингэхдээ Украины талаас гарсан аливаа өдөөн хатгалгад хариу цохилт өгөхөд бэлэн байхыг Путин зэвсэгт хүчиндээ даалгаж байв.

Украины ерөнхийлөгч Володимир Зеленский энэхүү “Улаан өндөгний түр завсарлага”-ыг бас хэрэгжүүлэхэд бэлэн байгаагаа илэрхийлсэн юм.

Харин Ням гарагт Зеленский энэхүү гал зогсоох арга хэмжээг Оросын арми огт хэрэгжүүлээгүй бөгөөд Путиний хуурамч “пиар” байсныг нь мэдээлжээ.

Ням гарагийн өглөөний 10:00 цагаас хойш Оросын тал хүнд зэвсэг хэрэглэн гал зогсоох шийдвэрээ 2,000 гаруй удаа зөрчиж, фронтын 67 чиглэлд довтолсныг тэр баталсан байна.

“Улаан өндөгний баярын үеэр гал зогсоох амлалтаа Оросын тал зөрчсөн тохиолдол бүрийг бид баримтжуулж байгаа бөгөөд холбоотнууддаа шаардлагатай мэдээллийг өгөхөд бэлэн байна. Эндээс харвал нэг бол Путин армиа бүрэн хянаж чаддаггүй, эсвэл дайныг зогсоох чин хүсэл байхгүй, зөвхөн гадна талд эерэг сэтгэгдэл төрүүлэх хуурамч Пиар явуулж буй бололтой” гэж Зеленский сошиал хуудсандаа бичжээ.

“Бидний хувьд энэ өдөр дайны ердийн нэг өдөр байлаа. Дайснууд төрөл бүрийн зэвсгээр галлаж, бүр нэг удаа манай байрлал руу довтлохыг оролдлоо” гэж Украины тэнгисийн хүчний 37 дугаар тусгай бригадын хэвлэлийн төлөөлөгч Денис Бобков мэдээлсэн байна.

Түүний хэлснээр Ням гарагийн 14:00 цагийн байдлаар тус бригад дайсны талаас нисгэгчгүй онгоцны 16 довтолгоо, их бууны хоёр удаагийн цохилтыг бүртгэжээ.

Тус бригад Донецк мужийн Покровск хотоос баруун өмнө зүгт оршдог Новопавливка тосгоны ойролцоо тулалдаж байгаа юм байна.

Харин Москвагийн эрх баригчид гал зогсоох санаачилгыг нь Украины тал 1,000 гаруй удаа зөрчсөн тухай мэдээлжээ.

Тухайлбал нисгэгчгүй онгоцоор дэд бүтэц болон иргэний байгууламжуудад 900 гаруй удаа довтолж, хохирол учруулсан гэж мэдээлсэн ч хэзээ, хаана ямар хэмжээний хохирол учруулсан талаар дэлгэрүүлээгүй байна.

Ням гарагт Америкийн консерватив хэвлэл мэдээллийн хэрэгсэл Fox News суваг Москвагийн үнэн алдартны шашны сүм хийдэд Путин улаан өндөгний баярын мөргөл үйлдэж буйг харуулсан дүрсийг шууд дамжуулахдаа Киевийг Оросын хот мэтээр харуулсан нь украинчуудыг бухимдуулсан юм.

“Москвад болж буй шашны арга хэмжээг дамжуулахын оронд Кремлийн эрх баригчид өөрийн санаачилсан гал зогсоох шийдвэрээ зөрчиж байгааг, бас улаан өндөгний баярын түр завсарлагыг 30 хоног болгон сунгах манай саналд анхаарлаа хандуулсан бол дээр байлаа” гэж Зеленский тус сувгийн үйл ажиллагааг шүүмжилсэн байна.

Украины гадаад хэргийн яам Киев хотыг алдаатай мэдээлсэн асуудлын талаар “Хэрвээ энэ нь улс төрийн санаатай үйлдэл биш, санамсаргүй алдаа байсан бол уучлалт гуйж, хэн алдаа гаргасныг шалгах ёстой” гэж мэдэгдээд Fox News сувгаас дипломат шугамаар тайлбар шаардсанаа дуулгажээ.

Эх сурвалж: The Guardian