Дипломат харилцаагаа сэргээх Оросын саналаас Гүрж улс татгалзав

Саяхан Оросын албаныхан Гүрж улстай дипломат харилцаагаа сэргээх санал гаргасан байна.

Харин Гүржийн эрх баригч болон сөрөг хүчний намууд алдсан газар нутгаа буцааж аваагүй тохиолдолд Орос улстай дипломат харилцаагаа сэргээхгүй гэсэн нэгдсэн байр суурьтай байгааг Коммерсантъ сонин Тбилисийн албаны эх сурвалжаас уламжлан өчигдөр мэдээлжээ.

2008 оны таван өдрийн дайны үр дүнд Гүржийн газар нутгийн 20 хувийг бүрдүүлж байсан Абхаз, Өмнөд Оссет мужууд Оросын тусламжтай салан тусгаарлаж байв.

Одоогоор эдгээр бүс нутгуудын тусгаар тогтнолыг цөөн хэдхэн улс хүлээн зөвшөөрсний нэг нь ОХУ юм.

Харин дэлхийн ихэнх улс орнууд албан ёсоор тэдгээрийг Гүржийн газар нутгийн нэг хэсэг гэж үзсэн хэвээр байгаа.

Ням гарагт ОХУ-ын гадаад хэргийн дэд сайд Михаил Галузин хэрвээ Гүрж улс Абхаз, Өмнөд Оссетын тусгаар тогтнолыг хүлээн зөвшөөрвөл Москва дипломат харилцаагаа сэргээхэд бэлэн байгаа тухай ярьжээ.

2008 оны дайны дараа Орос, Гүрж улсууд дипломат харилцаагаа тасалж байсан юм.

“Гүржийн эрх баригчид Абхаз, Өмнөд Оссетын талаар манай байр суурийг дипломат харилцаа сэргээх асуудалтай холбодогт бид харамсаж байна. Энэ бол эргэлт буцалтгүй шийдэгдсэн асуудал” гэж дэд сайд Известия сонинд ярьжээ.

Өчигдөр Кремлийн хэвлэлийн төлөөлөгч Дмитрий Песков бас Галузиний санааг давтаж,  Оросын эрх баригчид хоёр улсын дипломат харилцааг сэргээх сонирхолтой байгааг илэрхийлсэн байна.

Дээрх мэдэгдлүүдийн дараа Гүржийн парламентын спикер Шалва Папуашвили алдсан газар нутгаа буцааж аваагүй тохиолдолд дипломат харилцааг сэргээх ямар ч боломжгүйг мэдэгджээ.

“Орос-Гүржийн дипломат харилцааг сэргээхэд ганцхан саад бий. Энэ бол Оросын эзэлж авсан Гүржийн газар нутаг юм” гэж тэр хэлсэн байна.

Гүржийн сөрөг хүчний хууль тогтоогч Хатиа Деканоидзе дээрх байр суурийг дэмжиж байгаагаа мэдэгдээд эрх баригч Гүржийн Мөрөөдөл нам Москватай харилцаагаа сэргээх далд сонирхолтой ч олон нийтийн эсэргүүцлээс болгоомжлоод ингэж чадахгүй байгааг илэрхийлжээ.

“Тэд Гүржийн ард түмнийг хилэгнүүлэхээс айсандаа ингэж зүрхлэхгүй байгаа юм” гэж Деканоидзе ярьсан байна.

Эх сурвалж: Коммерсантъ