Өрмийн цооногт осолдсон гурван настай охины нэрээр төрийн хянан шалгах ажиллагааг нэрлэжээ
Улсын Онцгой комиссын нэгдүгээр хуралдаан өнөөдөр болжээ. Хуралдаанаар хэлэлцсэн асуудлыг талаар Шадар сайд Н.Номтойбаяр мэдээлэл хийлээ.
"Төв аймгийн Заамар суманд болсон харамсалтай үйл явдалтай холбоотойгоор уул уурхайн нөхөн сэргээлт хийгээгүй орхисон нүхийг бөглөх ажлыг эхлүүлсэн гэсэн. Улсын хэмжээнд хэдэн ийм нүх байгааг тогтоосон уу" гэдэг асуултад тэрбээр дараах хариулыг өгөв.
Шадар сайд Н.Номтойбаяр "Улсын хэмжээнд анх удаа байгаль орчны хяналт шалгалтын хийж байна. Байгаль орчин, Уул уурхайн яамд, цагдаа болон холбогдох бүх байгууллагууд хамтраад ажиллаж байгаа. Өнөөдрийн хурлаар тодорхой мэдээллүүд авлаа. Улсын хэмжээнд тэдэн нүх байна гэж хэлэх боломжгүй. Хяналт шалгалтын явцад тогтоогдоно.
Одоогийн байдлаар зөвхөн Заамар суманд уул уурхайн үйл ажиллагаа явуулж байгаа компани болон нөхөрлөл статустай байгууллагуудын 13-т нь үзлэг шалгалт хийгээд явж байна. Цаана нь нэлээн олон байгууллага бий. Өнөөдрийн УОК-ын хурлаас цагдаагийн байгууллагыг оролцуулсан комиссыг нэмэлтээр гаргахаар боллоо.
Эцэг эхээс нь /Төв аймгийн Заамар суманд уурхайн өрмийн цооногт гурван настай охин унаж, нас барсан/ зөвшөөрөл авсны үндсэн дээр “Хотулун гүнж” нэртэй Уул уурхай, Байгаль орчны яамд болон цагдаа, стандартын байгууллагуудын хамтарсан хянан шалгах ажиллагааг эхлүүлсэн" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
