32 метрийн гүнзгий нүхэнд унасан буцалтгүй нэрвэгдэгчийг гаргажээ

Аврагчид 32 метрийн гүнзгий нүхэнд унасан 3 настай хүүхдийн цогцсыг урд шөнө гаргажээ.

Энэ тухай Онцгой Байдлын Ерөнхий Газраас "Төв аймгийн Заамар сумын нутаг дэвсгэрт уурхайн цооногт 3 настай хүүхэд 40-50 метрийн гүн нүхэнд унасан дуудлага тавдугаар сарын 27-ны өдрийн 13:40 цагт ирсэн.

Тухайн цооногийн дэргэд 45м өргөн, 70м урт, 32м гүнтэй нүхийг 3 дамжлагатай налуу ам гарган шатлан ухаж, хөндлөн малталтын ажлыг тавдугаар сарын 28-ны өдрийн 22:00 цагт эхлүүлж, өнөөдөр (2026.05.30) 00:23 цагт буцалтгүй нэрвэгдэгчийг гарган, Цагдаагийн байгууллагад хүлээлгэн өглөө.

Ослын голомтод Уул уурхайн аврах 09 дүгээр анги, Төв аймгийн Онцгой байдлын газрын алба хаагчид ээлжлэн метр өндөр, 80 см өргөн, 11.8 метр урт хөндлөн малталтыг хийлээ.

Буцалтгүй нэрвэгдэгч цооногт унаснаас хойш 59:46 цаг, ажиллагааг эхлүүлснээс хойш 55:19 цагийн хугацаанд нийт 16 байгууллагын 102 хүн, 30 автомашин, хүнд даацын 8 автомашин, 1 ковш, 2 экскаватор, 1 кран, 1 шатахуун тээвэрлэгчтэйгээр, гар ажиллагааны 29 нэр төрлийн 138 багаж хэрэгсэлтэйгээр ажиллагааг зохион байгууллаа.

Буцалтгүй нэрвэгдэгч гэж гамшиг, аюулт, үзэгдэл, ослын улмаас амь насаа алдсан хүнийг хэлнэ" гэж мэдээллээ.

Талийгаачийн гэр бүлд гүн эмгэнэл илэрхийлье.