Трамп ихэнх орнуудын импортын татварын үйлчилж эхлэх хугацааг 90 хоногоор хойшлуулсан ч Хятадынхыг 125 хувьд хүргэв

Тал талын шахалтад орсон АНУ-ын ерөнхийлөгч Дональд Трамп өнгөрсөн долоо хоногт зарласан импортын өндөр татварын үйлчилж эхлэх хугацааг ихэнх улс орнуудад 90 хоногоор хойшлуулжээ. Гэхдээ энэ хугацаанд өмнөх түвшинд нь буцаахгүй, 10 хувийн суурь хэмжээнд хүргэж буулгах юм байна.

Тиймээс энэхүү арга хэмжээнд 10 хувиас дээш татвартай болоод байсан 75 улс хамрагдаж байгаа юм.

Харин Хятад улсын АНУ-д импортлох бараа бүтээгдэхүүний татварын хэмжээг дахин өсгөж, 125 хувьд хүргэж байгааг Трамп зарлажээ.

Трампын мэдэгдлийн өмнө Хятад улс АНУ-ын бараанд оноох импортын татварын хэмжээг өмнө нь зарласан 34 хувиас 50 нэгж хувиар нэмэгдүүлж, 84 хувьд хүргэсэн юм.

Татварын хэрэгжилтийг хойшлуулах шийдвэр АНУ-ын хөрөнгийн зах зээлд сайнаар нөлөөлж, өчигдөр гол индексүүд дунджаар 10 орчим хувиар өссөн байна.

Индексүүд сүүлийн өдрүүдэд 20 орчим хувиар унаад байсан нь ийнхүү тодорхой хэмжээнд нөхөгджээ.

“Хятад улс хэлэлцээр хийхийг хүсэж байгаа. Гэхдээ тэд үүнийг яаж хийхээ мэдэхгүй байна. Ерөнхийлөгч Ши бол бардам хүн. Би түүнийг маш сайн мэднэ. Тэд үүнийг яаж хийхээ мэдэхгүй байгаа ч удахгүй аргаа олох байх. Одоо тэд арга замаа тодорхойлох шатандаа явж байна” гэж Трамп сэтгүүлчидтэй уулзахдаа ярьсан байна.

Ингэхдээ тэр Хятадын барааны импортын татварыг 125 хувиас нэмж өсгөх шаардлага гарахгүй гэдэгт найдаж байгаагаа илэрхийлжээ.

“Үүнээс дээш өсгөх тухай надад төсөөлөгдөхгүй байна. Дахин өсгөх хэрэгцээ гарахгүй гэж би бодож байна” гэж Трамп хэлсэн юм.

Тэр бас Хятадын төрийн тэргүүнтэй уулзахад бэлэн байгаагаа “Тэр бол миний найз. Түүнтэй уулзана гэдэгтээ итгэлтэй байна” хэмээн илэрхийлжээ.

Гэхдээ Трампын ухралт худалдааны дайны эрсдэлээс бүрмөсөн зайлсхийсэн гэсэн үг биш юм.

Төлөвлөсөн арга хэмжээний хэрэгжилт нь түр хугацаанд хойшлогдсон, бас гол худалдааны түнш Хятадтай холбоотой маргаан шийдэгдээгүй байна.

Өнгөрсөн онд Хятад улс Мексикийн дараа АНУ-ын хоёр дахь том бараа бүтээгдэхүүн нийлүүлэгч болж байв.

Тухайлбал 2024 онд Мексик улс $506 тэрбум, Хятад улс $439 тэрбумын барааг АНУ-д импортолжээ.

Цагаан ордны гадна сэтгүүлчидтэй уулзахдаа Трамп өөрийн авч буй арга хэмжээг хамгаалж тайлбар өгсөн юм.

“Хэн нэгэн гохыг дарах ёстой байсан. Би үүнийг хийхэд бэлэн байсан. Энэ нь ганцхан Хятадын эсрэг биш гэдгийг та нар харж байгаа. Гэхдээ Хятад бол манай түүхэн дэх хамгийн том хүчирхийлэгч юм” гэж тэр хэлжээ.

Яагаад гэнэт шийдвэрээ эргэж харах болсныг нь асуухад Трамп “Уян хатан байх хэрэгтэй. Би ийм байж чаддаг. Заримдаа хүн хананы доогуур шургаж, заримдаа тойрон гарч, эсвэл дээгүүр нь давж чаддаг байх хэрэгтэй” гэж хариулсан байна.

Сүүлд АНУ-ын сангийн сайд Скот Бессент сэтгүүлчидтэй уулзахдаа хөрөнгийн зах зээлийн уналт Трампыг шийдвэрээсээ ухрахад хүргэсэн гэх таамгийг няцаажээ.

Түүний хэлж байгаагаар импортын өндөр татвартай тулгарсан 75 улсын зарим хэсэг яриа хэлэлцээ эхлүүлэх хүсэлт ирүүлсэн нь үүнд голлон нөлөөлсөн гэнэ.

Эх сурвалж: BBC