Д.Тумбааш: "Чингис хаан" олон улсын нисэх буудал руу хууль бус такси үйлчилгээ үзүүлж байгааг таслан зогсооно
"Чингис хаан" олон улсын нисэх буудалд хяналт шалгалт хийхэд зөвшөөрөлгүй таксигаар жуулчин, ажилчдыг тээвэрлэсэн зөрчил илэрсээр байгааг албаныхан мэдээлэв. Тус нисэх буудал руу хууль бус буюу зөвшөөрөлгүйгээр такси үйлчилгээ үзүүлж байгааг таслан зогсоох зорилготой хяналт шалгалт хийж байгаа аж.
Энэ тухай НТБГ-ын Автотээврийн хяналтын улсын байцаагч Д.Тумбааш "Нийтийн тээврийн бодлогын газраас такси үйлчилгээний тусгай зөвшөөрөл авсан таван компани байдаг. Эдгээр ААН-ийн үйл ажиллагаанд хяналт тавьж, стандартын шаардлагыг хангуулж байгаа юм.
Хоёрдугаарт хууль бус буюу зөвшөөрөлгүйгээр такси үйлчилгээ эрхлэгчдийн үйл ажиллагаанд хяналт тавьж байна. Ингэхэд жуулчин, ажилчид тээвэрлэх зөвшөөрөл аваагүй мөртлөө тээвэрлэх зөрчил илэрсэн.
Зөвшөөрөлгүйгээр такси үйлчилгээнд явж байгаа хүмүүст зөрчлийг давтахгүй байх, хуулийг таниулах чиглэлээр хэдэн өдөр ажиллалаа. Харин одоо энэхүү зөрчлийг давтан гаргасан тохиолдолд хариуцлага тооцож байна" гэж мэдээллээ.
Иргэний агаарын тээврийн Цагдаагийн хэлтсийн замын цагдаагийн зохицуулагч, цагдаагийн дэслэгч Э.Анхбаяр "Энэ сарын 2-ноос Нийтийн тээврийн бодлогын газрын автотээврийн улсын байцаагч нартай хамтран хувиараа такси үйлчилгээнд явж байгаа зөрчлүүдэд хяналт шалгалт хийх үйл ажиллагаа цаашид үргэлжилнэ. Одоогийн байдлаар автотээврийн улсын байцаагч нартай хамтран гарсан зөрчлүүдэд газар дээр нь арга хэмжээ тооцон ажиллаж байна" хэмээн ярив.
Энэ сарын 2-ноос "Чингис хаан" олон улсын буудлаас Таван шар, Сүхбаатарын талбай хүртэл нийтийн тээврийн автобус үйлчилгээнд явж эхэлсэн билээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
