• 5 сарын 21, Лхагва
|

"The MongolZ" баг гурван тоглолт дараалан хожсоноор "PGL Astana 2025" тэмцээний шөвгийн наймд шалгарав

Н.Эрхбаяр, iKon.mn
2025 оны 5 сарын 12
IKON.MN
Зураг зураг

Цахим спортын "Counter Strike 2" тоглоомын өндөр чансаатай "PGL Astana 2025" тэмцээн Казахстан улсын Астана хотод хоёр дахь өдрөө үргэлжилж байна.

1.2 сая ам.долларын шагналын сантай тус тэмцээнд манай улсын "The MongolZ" баг дэлхийн чансааны оноогоор уригдан оролцож байгаа юм. Энэ тэмцээнд оролцох 16 баг тойргийн журмаар тоглоно. Нэг баг нийт таван удаа тоглох эрхтэй. Түрүүлж гурван удаа хожсон найман баг нь Playoffs шатанд шалгарна.

"The MongolZ" багийн хувьд энэ тэмцээний эхний тоглолтдоо Бразилын "FURIA", хоёр дахь учраандаа "MIBR" багийг буулган авснаар тойргийн шатанд хоёр хожилтой болсон билээ.

Ийнхүү шөвгийн наймд шалгарахын төлөөх гурав дахь тоглолтоо өнгөрсөн оны дэлхийн аварга Украины "Natus Vincere" багтай "Во3" (гурван "map"-аар ялагчийг тодруулах) журмаар өнөөдөр тоглож, 2:0-оор хожлоо. 

Өнөөдрийн тоглолтод манай улсын баг өөрсдийн сонгосон "Inferno map" дээр хамгаалах талаасаа эхэлж, 4:8-аар байраа сольсон. Улмаар довтлох талаасаа өөрсдийн төлөвлөгөөгөө сайн хэрэгжүүлснээр 13:11 онооны харьцаатай ялалт байгуулав. Манай багийн AWPer буюу "мэргэн буудагч" 910 тус "map" дээр 17 kill хийж, бусад тоглогчдыг тэргүүлсэн юм. 

Үргэлжлүүлэн "Natus Vincere" багийн сонгосон "Mirage map" дээр довтлох талаасаа эхлүүлж хоёр үеийн давуутай байраа сольсон. Харин хамгаалах талаасаа сайн хамгаалж, 13:11-ээр ялалт байгуулав. "The MongolZ" багийн шөвгийн наймын учраа одоогоор тодорхой болоогүй байна. 

Астана хотод зохиогдож буй тус тэмцээн энэ сарын 18-н хүртэл үргэлжилнэ. Түрүүлсэн багт 400,000 ам.доллар, хоёрдугаар байрт 187,500 ам.доллар, гуравдугаар байрт 150,000 ам.доллар, дөрөвдүгээр байрт 87,500 ам.долларын шагнал өгөхөөр зохион байгуулагчид төсөвлөжээ. 
Тойргийн шатны тоглолтууд энэ долоо хоногийн Лхагва гарагт дуусна. Харин шөвгийн найман багийн хасагдах шатны тоглолтууд энэ долоо хоногийн Баасан гарагт "Barys Arena"-д зохион байгуулагдана. 
"PGL Astana 2025" тэмцээнийг Францын "Team Vitality", Саудын Арабын "Team Falcons" болон Данийн "MOUZ" гэсэн багууд өнжиж байгаа. Харин ойрын үед тэмцээнд оролцоогүй байсан ОХУ-ын "Team Spirit" энэ тэмцээнд тоглож байгаа юм.